Кулун тутар 26 күнүгэр улууска цеолиты переработкалыыр собуот оборудованиелара кэллилэр. Аны аҕыйах ыйынан цеолиты переработкалыыр собуот оборудованиелара таһыллан, асфальт-бетон собуот аттынааҕы территорияҕа баар эргэ хочуолунайга собуот үлэлиирэ былааннанар.
edersaas.ru, Валентина ФИЛИППОВА
Бу цеолиты переработкалыыр собуоту киллэрэри туруорсубут, элбэхтик сүүрэн-көтөн быһаарсыбыт киһинэн — өр сылларга цеолит диэн саха сиригэр көстүбүт эмтээх, туһалаах, дьикти тааһы үөрэппит, билигин «Үөһээ Бүлүү» хаһыат эрэдээктэр-дириэктэринэн үлэлиир, биир дойдулаахпыт Степан Михайлович Иванов буолар. Улуус сайдыытыгар улахан болҕомтотун уурар Аҕа Баһылыкпыт В.С. Поскачин бу агропромышленность, тыа хаһаайыстыбатын салааларыгар саҥа хардыыны өйөөн, улуус Мунньаҕын сэбиэтэ (бэрэссэдээтэл Н.Н. Николаев) уураахтаан, 5 мөлүйүөн солкуобай үбү көрөн, ФКУ-нан улуустааҕы тыа хаһаайыстыбатын департаменынан (начаалынньык С.И. Иванов) төлөнөн кэлэн, тустаах оборудование кэллэ. Аны хаалбыт кыра оборудованиелар кэлэллэрэ күүтүллэр.
Цеолиты переработкалыыр собуоту урукку өттүгэр улуус уонна Үөдүгэй нэһилиэгин дьаһалталарыгар үлэлии сылдьыбыт Сергей Иннокентьевич Федоров быһаччы салайан үлэлэтиэҕэ.
Цеолит тыа хаһаайыстыбатыгар туһатын туһунан этэр буоллахха, Степан Михайлович СӨ тыатын хаһаайыстыбатын министиэристибэтин кытары кэпсэтэн, цеолиты үүнээйигэ, сүөһүгэ, сылгыга эбии аһылык быһыытынан туттарга үөрэтии бара турар.
⠀
Сунтаар улууһугар Кириэстээх ТХПК-ҕа үүнээйигэ, сүөһүгэ, сылгыга цеолиты туттуу холобура 2014 сылтан, алтыс сылын Дьокуускайдааҕы тыа хаһаайыстыбатын академиятын тыа хаһаайыстыбатын билимин кандидата, Үөһээ Бүлүү Намыттан төрүттээх Н.М. Черноградская (Гаврильева) салайыытынан бара турар. Онуоха аатырбыт ыанньыксыт Владимир Африканович Михайлов цеолиты сүөһүгэ сиэттэххэ, үүтэ элбиир уонна доруобуйата, түүтэ тупсар эбит диэн, түмүк оҥорорун тоһоҕолоон бэлиэтиэххэ сөп. 2016 сыллаахха ЯНИСХ растениеводство отделын научнай үлэһитэ, биологическай наука билимин кандидата М.П.Сидорова салайыытынан, Сунтаар Элгээйитин СХПК-тыгар хортуоппуйга, оҕурсууга, помидорга цеолиты туттан, уопут оҥоһуллубута, үчүгэй көрдөрүүнү биэрбитэ.Бу икки улахан научнай тэрилтэлэр цеолит бу хайысхаларга туһатын туһунан үлэлэрэ барыта тустаах аакталарынан (отчуоттарынан) бигэргэнэн тураллар.
Дьэ, ити курдук, сайдыы саҥа саҕахтара улууспутугар киирэн, агропромышленность салаатыгар маҥнайгы хардыы оҥоһулунна! Тыа хаһаайыстыбата сайдарыгар биир саҥа,, сонун технология киириитигэр олук уурулунна!
⠀
⠀⠀Валентина ФИЛИППОВА, «Үөһээ Бүлүү» хаһыат