Бүлүү улууһугар 19 эдэр ыалга дьиэлэнэр туһунан туоһу сэртипикээттэри туттардылар.
Бу туһунан улуус дьаһалтатын социальнай эйгэни уонна ыччат салаатын сүрүннүүр исписэлиис Татьяна Федорова сырдатта:
— Хааччахтаныы кэмин кэспэккэ, график оҥорон, бүгүн улууспут 19 эдэр ыалыгар дьиэлэнэр туһунан сэртипикээттэри уочаратынан туттардыбыт.
«2020-2024 сылларга дьиэнэн хааччыллыы» диэн анал бырагыраамма баар. Бу бырагыраама улууспутугар 2009 сылтан үлэлиир. Уочараттаах буолан, 2015 сыллаахха уочаракка турбут дьон сэртипикээттэрин быйыл туттулар.
19 ыалтан түөрдэ элбэх оҕолоох. Алта нэһилиэктэн, ол эбэтэр Тылгыны, Чочу, Хампа, Баппаҕаайы, Бороҕон, Халбаакы олохтоохторо тигистилэр.
Дьиэ туттуу болдьоҕо 2022 сылга диэри. Харчы «Сбербааҥҥа» докумуоннарын туттарбыттарын кэнниттэн, бэрэбиэркэни ааһан баран түһүөҕэ.
Ульяна Захарова, edersaas.ru
Хаартыскалар — Бүлүү улууһун дьаһалтатын
тус архыыбыттан көҥүллээх туһанылыннылар.