«Эдэр саас» 2015 сылы атаарар

Бөлөххө киир:

Сыл бүтүүтэ үгэс курдук биһиги редакциябытыгар 12 ыйдааҕы үлэбит түмүгүн таһаарабыт. 2015 сыл элбэх умнуллубат түгэни бэлэхтээтэ. Биир сиргэ олорбокко, Саха сирин бары муннуктарыгар кэриэтэ оройуоннарынан элбэхтик айаннаатыбыт. Ыччат эйгэтигэр буолбут чаҕылхай тэрээһиннэри, ситиһиилээх, үлэһит, отчут-масчыт эдэр дьону көтүппэккэ сырдаттыбыт. Үгэс буолбут тэрээһиннэрбитин – оскуола оҕолорун идэҕэ туһаайар «Саха ыччатын – промышленноска-14» экспедицияны, «Саха ыччатын – тыа сиригэр-2015» оту кэбиһиигэ, ынах ыаһыҥҥа, солуур оргутууга күрэхтэһиини этэҥҥэ ыыттыбыт. Ыччат ыһыаҕын суолунан Томпо улууһугар, итиэннэ уруулуу норуокка, Хайалаах Алтайга, эдэр суруналыыстар пресс-десаннарын тэрийдибит. Редакциянан «СахаСелигер», «Таврида» форумнарга, «Министр», «Эдэр фермер» дьыалабыай оонньууларга, суруйааччылар, эдэр учууталлар, туризм слеттарыгар о.д.а тэрээһиннэргэ кытынныбыт. Хаһыаппыт матырыйаалларын билигин видеонан көрүөххэ уонна социальнай ситимнэргэ (Instagram – @edersaas; Facebook – «Эдэр саас») ааҕыахха сөп буолла. Кэлэр сылга былааммыт баһаам. Барыта орун-оннугар туран, табылларын туһугар кыһаныахпыт.

Ульяна Захарова, «Эдэр саас» суруналыыһа:

— Ааһан эрэр 2015 сылга «Бичик» кинигэ кыһатыгар «Атын таптал» диэн кэпсээннэрдээх хомуурунньугум бэчээттэнэн тахсыбыта. Үлэм сүнньүнэн үгүс командировкаларга сылдьан сэргэх дьоннуун билистим. Ааспыт сайын Хара муораҕа сынньанным. Туорт оҥорон мастиканан киэргэтэргэ үөрэнним. Хас биирдии киһи бэйэтигэр саҥа дьоҕуру арыйарга дьулуһуохтаах дии саныыбын. Үүнэр 2016 сылтан үгүс үөрүүнү күүтэбин. Чугас дьонум этэҥҥэ буоллуннар.

Айтана Аммосова, «Эдэр саас» суруналыыһа:

— Сайын Томпоҕо буолбут Ыччат ыһыаҕар сылдьан элбэҕи билэн-көрөн, сынньанан кэбитим ааһан эрэр 2015 сыл умнуллубат күннэрэ буолаллар. М.К. Аммосов аатынан ХИФУ суруналыыстыкаҕа салаатын бүтэрэн, үлэһит буоллум. Эһиил ГИТИС-кэ кэтэхтэн үөрэхпин бүтэрэн театр кириитигин идэтин ылыахтаахпын. Кэлэр сылга омук дойдуларын көрүөхпүн, элбэхтэ айанныахпын, умнуллубат түгэннэр элбииллэригэр баҕарабын.

Станислав Иовлев «Эдэр саас» суруналыыһа:

— Бу ааһан эрэр 2015 сыл миэхэ олус ситиһиилээхтик ааста. Ол курдук, мин дьоммун кытта кыттыһан Дьокуускай куоракка кыбартыыра атыыластым. Иккиһинэн, суши оҥорорго үөрэнним. Киһи саҥаны сатыырга талаһыахтаах. Онон кэлэр сылга массыына ыытар быраабы ыларга үөрэниэхпин баҕарабын. Дьол хараҕа суох дииллэр. Баҕар, табылыннаҕына, тимир көлөлөнөн да хаалыахпын сөп.

Күндү ааҕааччыларбыт, сахалыы тыллаах «Эдэр саас» хаhыаты кытта куруутун бииргэ буолуҥ. Биhиги хаhыаппытын өйүүр Ыччат политикатын уонна дьиэ кэргэн дьыалаларын министиэристибэтигэр, Профессиональнай үөрэхтээһин министиэристибэтигэр, Тыа хаһаайыстыбатын министиэристибэтигэр, «Саха» НКИХ араадьыйатыгар, телевидениетыгар, доҕотторбутугар – оройуоннар ыччатын лидердэригэр, «Я-ИНЖЕНЕР» түмсүүгэ, «Саха КВН» түмсүүгэ, «Дьулуур» оҕо сомоҕо хамсааһыныгар, «СахаЦентроВуз» киин үөрэх кыһаларын устудьуоннарын түмсүүтүгэр, «ДетСаТ» айар түмсүүгэ, СР тутар этэрээттэригэр, ХИФУ устудьуоннарын идэлээх сойууһугар, Ыччат парламеныгар, Эдэр суруналыыстар кулууптарыгар, Арктика эдэр лидердэрин түмсүүтүгэр барҕа махталбытын тиэрдэбит. Эһиги ыччат сахалыы ааҕарын туhугар кыhамньыгыт, кылааккыт улахан. Чэгиэн-чэбдик буолуҥ, тапталы, табыллыыны уонна ситиһиини! Санаабыккыт сатаннын, толкуйдаабыккыт туоллун, чугас дьоҥҥутугар доруобуйаны, дьолу баҕарабыт!

P.s: 2015 сыл түмүгүнэн ыччат политикатыгар үлэлиир эдэр суруналыыстарга туттарыллар «Сыл бастыҥ суруналыыһа» наҕарааданы ыллым. Бу биһиги редакциябыт хорутуулаах уонна кыһамньылаах күргүөмүнэн үлэбит түмүгэ. Нууччалыы чопчулаатахха, «это итог работы нашей маленькой, но дружной и супер-работоспособной команды».

Надежда САМСОНОВА, «Эдэр саас» хаһыат редактора.