«Бэс чагда» оҕону чэбдигирдэр уонна сынньатар кииҥҥэ «Күөх пионердар» IV өрөспүүбүлүкэтээҕи слет кыттааччылара хайдах дьаһанан, бөҕү таһаарбат туһунан кэпсэттилэр. Лиэксийэни уопсастыбаннай эколог Ирина Бугаева ыытта.
edersaas.ru
Кини эдэр экологтарга былаастык бөҕү хайдах аҕыйатар, тулалыыр айылҕаны харыстыыр туһунан кэпсээтэ. «Күөх пионердарга» туһаайан, хас биирдии киһи олорор тэлгэһэтин ыраастык тутан, уопсастыбаннай сиргэ, айылҕаҕа эмиэ бөҕү бырахпат курдук дьаһаныан сөбүн иһитиннэрдэ.
«Бэйэбититтэн саҕалаатахпытына уонна чугас дьоммутугар, доҕотторбутугар холобур буоллахпытына, биһиги олорор сирбит күөх, ыраас, кыраһыабай буолуо», — диэн эттэ кини.
Оҕолор Иринаны болҕомтолоохтук истэн, кытаанах тобоҕу аҕыйатарга уонна хомуйарга санааларын үллэһиннилэр. Ол туһунан СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ иһитиннэрэр.
Хаартыска СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтиттэн
«Саха сирэ», edersaas.ru