Эдьээннэр учуутал кийииттэрэ уһанан сөхтөрөр

Ааптар: 
Бөлөххө киир:

 Уус Маайа улууһун Эдьээн нэһилиэгэ талааннаах учуутал кийииттэринэн аатырар.

edersaas.ru

Чурапчы улууһун Одьулуунуттан төрүттээх нуучча тылын учуутала Снежана Винокурова Уус Маайа улууһугар 2013 сылтан кийиит буолан кэлиэҕиттэн, талан ылбыт идэтинэн үлэлиир.

Эдэр учуутал туһунан кини кэллиэгэтэ, Эдьээҥҥэ ытыктанар педагог Ирина Винокурова маннык кэпсиир:

Снежана Юрьевна учуутал быһыытынан бэйэтин араас хайысханан сайыннарар, улуустааҕы да, өрөспүүбүлүкэтээҕи да тэрээһиннэргэ педагог быһыытынан мэлдьи кыттар, бэйэтин кыаҕын саҥаттан саҥа өттүнэн арыйарга дьулуһар. Ол курдук, 2014 сыллаахха Чурапчы улууһугар ыытыллыбыт эдэр учууталлар конкурустарыгар кыттыбыта, 2016 сыллаахха улууска «Сыл бастыҥ учуутала» куонкуруска бастаабыта. 2019 сыллаахха Тааттаҕа ыытыллыбыт V өрөспүүбүлүкэтээҕи педагогическай дьаарбаҥкаҕа тус бырайыагын көмүскээн, Гран-при аатын ылбыта. Ааспыт сайын Уус Майа улууһун «Мисс Айакчаана 19» диэн үрдүк аатын ылары ситиспитэ.

    

Снежана Юрьевна оҕуруонан, ииһинэн дьарыктанарын ааһан, учууталларга маастар-кылаас ыытар. Кэллиэгэлэрин кини өссө маһынан уһанан, бэйэтин сатабылынан сөхтөрөр. Кыралаан дьиэ тэрилин, оҕолоругар ыскаап оҥорор. 

Маны таһынан, хоһоон суруйан холонор.  Ити курдук ситиһиилээх, «дьоҥҥо туох эрэ туһалааҕы оҥордорбун» диэн санаалаах кыахтаах, талааннаах кийииппитинэн биһиги, эдьээннэр, киэн туттабыт.

Үөрэхтэрин бүтэрэн, тыа сирин сайыннара тиийбит эдэр учууталлар иккис дойду оҥостубут сирдэригэр убаастанар учуутал быһыытынан эрэ буолбакка, өссө тыа сирин сис ыалларын ахсааныгар киирэн эрэллэрэ — кэрэхсэбиллээх.

Елена ПОТОЦКАЯ, «Cаха сирэ» хаһыат, edesaas.ru

 

+1
0
+1
0
+1
0
+1
0
+1
0
+1
0
+1
0