Эбээн Бытантайга аҕа ууһун общината олохтоох агрооскуоланы кытары ыкса үлэлиир...
Олох-дьаһах - Тыа сирэ

Эбээн Бытантайга аҕа ууһун общината олохтоох агрооскуоланы кытары ыкса үлэлиир

Ил Дархан Айсен Николаев салайааччылаах бырабыыталыстыба бөлөҕө Эбээн Бытантай улууһугар сырыытыгар тыа хаһаайыстыбатын миниистирэ Александр Атласов Дьарҕаалаах нэһилиэнньэни кытары көрүстэ.

Августина, Иннокентий Старостиннар 2017 с. «Саҥа саҕалыыр бааһынай хаһаайыстыба» бырагырааманан грант ылан, отуттан тахса сүөһүлэннилэр. Сүөһүлэрин өссө элбэтэр инниттэн, «Тыа хаһаайыстыбатынан дьарыктанар дьиэ кэргэн» диэн хайысханан граҥҥа киирсэр баҕа санаалаахтар.

Эдэр бааһынайдар Августина, Иннокентий Старостиннар миниистиргэ инники былааннарын билиһиннэрэллэр

Салгыы миниистир Александр Атласов толору хааччыллыылаах, таба этин астыыр модульнай сыахха сырытта. Санатар эбит буоллахха, бу сыах 2018 с. Хотугу норуоттар III оонньууларыгар аһыллыбыта. Сыаҕы үлэлэтэр «Кочевник» аҕа ууһун общинатын баһылыга Альберт Колесов төһө бородууксуйаны оҥороллорун, инники былааннарын туһунан сиһилии кэпсээтэ. Бородууксуйаны киин куоракка ыытан, киэҥ эйгэҕэ таһаарыан баҕарарын, онуоха тиэйии-таһыы ороскуота эбиллэн, сыана олус ыараан тахсарын туһунан эттэ.
«Кочевник» община И.Н.Слепцов аатынан Кустуур агрооскуолатын кытары ыкса үлэлиир, сайын ахсын оҕолору ыстаадаларга таһааран, эбээн омук төрүт дьарыгар сыһыарар. Быйыл 35 оҕону сайылатта. Кыракый табаһыттарга Үлэлээх буолуу киинин нөҥүө 2,5 ыйдаах хамнастара төлөммүт. Оҕолор ыстаадаларга суол-иис баар кэмигэр, кулун тутарга, тахсан баран ыкса күһүн, үөрэх дьыла саҕаланыыта бөһүөлэккэ киирэр эбиттэр, онон кинилэргэ хамнас үс ыйга төлөнөрө наада буолсу.

Саха сүөһүтүн иитиигэ идэтийэр генофонднай хаһаайыстыбаҕа аныгы ирдэбилгэ эппиэттир саҥа хотон былырыын үлэҕэ киллэриллибитэ

«Гарпан» этнокултуурунай кииҥҥэ миниистир олохтоохтору кытта көрүстэ. Тыа хаһаайыстыбатынан дьарыктанар дьон от тиэллиитин, сүөһүгэ эбии аһылык уо.д.а. туһунан ыйыттылар. Ыанар ынахха көрүллэр көмө харчы субай сүөһүгэ кытта бэриллэригэр баҕа санааларын эттилэр. Бу өйдөнөр даҕаны, Эбээн Бытантай улууһа дьиҥнээх саха сүөһүтүн симэлиппэккэ, атын боруодалары кытта булкуйбакка иитэн кэлбит соҕотох улуус буолар. Маны тэҥэ саха сылгытын иитиитинэн дьарыктанар дьон сылгыга көрүллэр харчы тоҕо киин улуустары кытта тэҥин ыйыттылар, хотугу улуус усулуобуйата ыараханынан бөлөхтөрүнэн араарарга эттилэр. Онтон таба иитиитигэр сыллата көрүллэр субсидия харчытыгар, табаһыттар хамнастарыгар эмиэ элбэх ыйытык баар, бу маны үлэ бэрээдэгин быһыытынан быһаарсыахпыт диэн тарҕастылар.

«Бытантай уоттара» хаһыат, «Саха сирэ» хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

два × два =