Эбээн Бытантай улууһун дьаһалтатын сүрүннүүр исписэлииһэ Максим Горохов улууска коронавирус дьаҥа тарҕамматыгар туһуланар үлэ хаамыытын «Саха сирэ» хаһыат саайтыгар кэпсээтэ.
—16 киһиттэн турар анал ыстаап тэриллэн үлэлии олоробут. Улуус баһылыга Гаврил Горохов салайааччылаах ыстаапка нэһилиэктэр баһылыктара, тэрилтэлэр салайааччылара киирдилэр. Киин поликлиникаҕа 15 куойкалаах обсерватор бэлэмнээтибит.
Билиҥҥи туругунан улууска коронавируска хаптарбыт эбэтэр бу ыарыыга саарбаҕаланар киһи суох. Омук сириттэн кэлии эмиэ суох. Норвегияттан кэлбит биир дойдулаахпыт Дьокуускай куоракка обсерваторга хаалбыта. Билигин киин куораттан улууска нэдиэлэҕэ биир эрэ рейс баар. Мантан дьон көтүүтэ да аччаата. Холобур, иллэрээ күн Дьокуускай куораттан кэлэ сылдьыбыт үс киһи эрэ мантан көттө. Дьокуускайтан кэлбит устудьуоннарбыт дьиэттэн тахсыбакка олороллорун хонтуруоллуубут. Уулуссаҕа дьон сылдьыыта биллэ аҕыйаата.
Улуус урбаанньыттара ыраахтан атыыга көспүттэрэ. Балар үксэ ас-үөл атыылыыр маҕаһыыннаахтар. Ас, хаһаайыстыбаннай табаар атыылыыр маҕаһыыннар үлэлии тураллар. Ас-таҥас барыта кыһыҥҥы суолунан эрдэттэн былаанынан аҕалыллар буолан, ити өттүгэр кыһалҕа суох. Улуус олохтоохторо аһылыгынан, табаарынан, уматыгынан, эминэн толору хааччыллан олоробут. Улуус үрдүнэн мэдиссиинискэй мааска атыыга баар. Манна иистэнэр дьоҕус тэрилтэлэр өҥөлөрө улахан. Төһө да интэриниэтинэн сибээспит мөлтөх буоллар, оскуола оҕолоругар дистационнай үөрэх тэриллиэҕэ.
Ньургуйаана Иванова, «Саха сирэ» хаһыат, edersaas.ru
Хаартыска Максим Горохов түһэриитэ