Дзамболат Тедеев: “Парижка кырата үс кыһыл көмүс мэтээли ылыахтаахпыт”
Ааспыт бээтинсэҕэ, атырдьах ыйын 18-гар, Сочига, «Юг Спорт» кииҥҥэ дойду чулуу бөҕөстөрүн икки ардыларыгар хонтуруоллуур хапсыһыылар буоллулар. Ол түмүгүнэн аан дойду түһүлгэтигэр кыттар Арассыыйа Федерациятын көҥүл тустууга сүүмэрдэммит хамаандатын састааба бигэргэннэ.
Онно биллибитинэн, Парижка буолар аан дойду чөмпүйэнээтигэр былырыыҥҥы олимпийскай хамаандаттан соҕотох Абдулрашид Садулаев эрэ кыттар буолбут. Биэс тустуукпут маннык таһымнаах күрэхтэһиигэ саҥа сүрэхтэниэҕэ. Кинилэртэн Гаджимурад Рашидов (61 кг) уонна Завур Угуев (57 кг) Европа чөмпүйэнээтигэр кыттыбыт уопуттаах буоллахтарына, Магомедхабиб Кадимагомедов (70 кг, Дагестан), Владислав Валиев (86 кг, Алания), Анзор Хизриев (125 кг, Санкт-Петербург) сүүмэрдэммит хамаандаҕа саҥа дьонунан буолаллар. Онон быйылгы чөмпүйэнээт Арассыыйа хамаандатыгар улахан тургутуунан буолара күүтүллэр.
Арассыыйа Федерациятын көҥүл тустууга сүүмэрдэммит хамаандатын сүрүн тириэньэрэ Дзамболат Тедеев WRESTRUS.RU кэрэспэдьиэнигэр биэрбит интервьютугар аан дойду быйылгы түһүлгэтигэр 2020 сылга Токиоҕа ыытыллар Олимпийскай оонньууларга сыаллаан, эдэрдэри тургутан көрүөхпүт диэтэ. Ол үрдүнэн, сүрүн тириэньэр Парижка кырата үс кыһыл көмүс мэтээли ыларга суоттанар. “Хамаандабытыгар дебютаннар элбэхтэр эрээри, хас биирдиилэрэ чопчу сыаллаахтар-соруктаахтар. Онон бэриллэр бары кыаҕы барытын туһана сатыахтаахтар”, — диэтэ кини.
Бу бээтинсэҕэ, атырдьах ыйын 25 күнүгэр, 51, 61, 86 уонна 125 кг ыйааһыннаах бөҕөстөр тустуохтара, сарсыныгар 65, 70, 74 уонна 97 кг ыйааһыннарга хапсыһыылар буолуохтара.
Арассыыйа көҥүл тустууга сүүмэрдэммит хамаандатын састааба:
51 кг — Заур Угуев, 61 кг — Гаджимурад Рашидов, 65 кг — Алан Гогаев, 70 кг — Магомедхабиб Кадимагомедов, 74 кг — Хетик Цаболов, 86 кг — Владислав Валиев, 97 кг — Абдулрашид Садулаев, 125 кг — Анзор Хизриев
Роман ПОПОВ, “Саха сирэ” хаһыат, edersaas.ru