Быйыл Олоҥхо тыйаатыра тэриллибитэ тоҕус сыла буолла. Тоҕус сахаларга дириҥ суолталаах сыыппара буоларын быһыытынан, Олоҥхо тыйаатыра саҥа сылы П.П.Ядрихинскай – Бэдьээлэ «Дьырыбына Дьырылыатта»олоҥхотун туруоран саҕалыыр. Испэктээккэ кыыс бухатыыр төрүөҕүттэн ойох барыытыгар диэри ураты дьылҕата көстүөҕэ. https://edersaas.ru
Саҥа испэктээк олунньу 14-15 күнүгэр сүрэхтэниэ, ол иннинэ Нам улууһун Партизан сэлиэнньэтигэр олунньу 7-8 күннэригэр көрдөрүөхтэрэ. Испэктээги Матрена Корнилова режиссердаан туруорда:
— Бэдьээлэ “Дьырыбына Дьырылыатта Кыыс Бухатыыра” “Дьулуруйар Ньургун Боотур” олоҥхону кытта биир кэккэҕэ турар олоҥхо. Бу айымньы тыла-өһө чэпчэки, киһи аахта даҕаны тута өйгө киирэр. Аны дьону соһутар элбэх ураты уобарастардаах – Абааһы кыыһа, Айыы кыыһа, өксөкү кыыл… Сыананы көрөөччүлэрбитин соһутар гына сонуннук киэргэтиэхпит.
Сүрүн оруолу — Дьырыбына Дьырылыаттаны Лена Оленова толорор. Эдэр артыыс сүрүн оруолга иккис ананыыта, бу иннинэ «Кубулҕат Куо» испэктээккэ оонньообута. Кинини таһынан өссө Лена Маркова, Александр Дьячковскай – Саарын, Павел Колесов, Владислав Иванов, Наталья Слепцова, Галина Тихонова уо.д.а. бааллар.