Дьокуускайга сүүс харахтаах дуобакка дьахталларга аан дойду чөмпүйэнээтэ саҕаланна

Бөлөххө киир:

М.К. Аммосов аатынан Хотугулуу-Илиҥҥи федеральнай университет “Сэргэлээх уоттара” култуурунай киинигэр сүүс харахтаах дуобакка дьахталларга XXXXIV аан дойду чөмпүйэнээтин үөрүүлээх аһыллыытыгар Дуобат аан дойдутааҕы федерациятын генеральнай сэкирэтээрэ Юрий Черток  этиитэ дохсун ытыс тыаһынан доҕуһуолланна.

Үөрүүлээх аһыллыы буоларын быһыытынан, бырааһынньыктыы киэргэтиллибит саалаҕа – сахалыы ырыа, үҥкүү дьиэрэйдэ, хомус тыаһа дуорайда… Сиэр-туом быһыытынан, алгыс оҥоһулунна. Арассыыйа гимнэ ньиргийдэ.

Саха Өрөспүүбүлүкэтин Аҕа баһылыгын уонна бырабыыталыстыбатын дьаһалтатын салайааччы Федор Борисов, биһиги өрөспүүбүлүкэбитигэр дуобакка аан дойду чөмпүйэнээтэ ыытылларынан эҕэрдэлээн туран, чөмпүйэнээти аһыллыбытынан аахта. Итиэннэ маннык үөрүүлээх кэрэ биэлиэ түгэҥҥэ Саха Өрөспүүбүлүкэтин Аҕа баһылыгын Ыйааҕынан, тириэньэр Василий Куприяновка (Мэҥэ Хаҥалас) – Саха сирин үтүөлээх тириэньэрэ, тириэньэр, гроссмейстер Петр Ушницкайга (Дьокуускай) – Саха сирин физическэй култуураҕа үтүөлээх үлэһитэ, тириэньэр Василий Кононовка (Дьокуускай)  “Гражданскай килбиэн” бэлиэни туттартаата.

Ити курдук эҕэрдэ тыллары Дуобат аан дойдутааҕы федерациятын генеральнай сэкирэтээрэ Юрий Черток уонна Арассыыйа дуобакка федерациятын бэрэсидьиэнэ Анатолий Никитин эттилэр, наҕараадалары туттардылар. Ол курдук, дуобат ахсаабат пропагандистара, спорт бэтэрээннэрэ: Николай Саввиновка, Альбина Аргуноваҕа, Мария Бырдынныроваҕа, Юрий Никифоровка, Елена Романоваҕа – Саха Өрөспүүбүлүкэтин Аҕа баһылыгын Махтал суруктара, Дуобат аан дойдутааҕы федерациятын өйдөбүнньүк бэлэхтэрэ туттарылыннылар.

Кырдьык да, бу күн “Сэргэлээх уоттарыгар” – дуобат бырааһынньыга бэлиэтэннэ. Фойеҕа дуобат устуоруйатын хаартысканан быыстапката туруорулунна. Гроссмейстердар Гаврил Колесов, Иван Токусаров, Николай Гуляев, Николай Гермогенов, Андрей Федотов, Николай Никаноров сүүһүнэн мустубут дуобаты таптааччылары кытта оонньуулара – сеанс буолла.

Аны эбиэттэн киэһэ, күнүс 15:00 чаастан “Триумф” Спорка бэлэмнэнии киинигэр аан дойду чөмпүйэнээтин бастакы туура ыытыллар.

Сэрэбиэй быһыытынан чөмпүйэнээт бастакы тууругар көрсүөхтэрэ:

Наталья Шестакова (Арассыыйа) – Ксения Нахова (Арассыыйа)

Тамара Тансыккужина (Арассыыйа) – Хейке Ферхеул (Нидерланды)

Айгуль Идрисова (Арассыыйа) – Виктория Мотричко (Украина)

Матрена Ноговицына (Арассыыйа) – Ю Чжан (Кытай)

Ханьцин Чжао (Кытай) – Хуслен Энхболд (Монголия)

Аннелайн Джейкобс (Аруба) – Бьягне Эрса Негбре (Кот-д Ивуар)

Наталья Садовска (Польша) – Палина Петрусева (Белоруссия)

Ольга Федорович (Белоруссия) – Дарья Федорович (Белоруссия).

Петр ПАВЛОВ.

Ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0