Итинник бириигэбэри от ыйын 6 күнүгэр Дьокуускай куорат федеральнай суута таһаарда. Ити дьыала туһунан “Доржиев дьыалатын көрүү саҕаланна” диэн ыстатыйам хаһыаппыт 2015 сыл алтынньы 8 күнүнээҕи нүөмэригэр бэчээттээммитэ.
Биэс адвокат көмүскээтэ
Дьыаланы эдэр судьуйа Игорь Верхотуров көрөн кэллэ. Кини судьуйанан ананыан иннинэ СӨ Борокуратууратын Коррупцияны утары туһуламмыт сокуону тутуһууну надзордуур отделын начальнигынан үлэлээбитэ. Сууттанааччы Доржиев интэриэһин биэс адвокат көмүскээтэ. Бу суут мунньаҕын Бурятияттан анаан-минээн кэлэн, «Бурятия» ТРК уонна «Байкал-продакшн» суруналыыстара дойдуларыгар сырдата сырыттылар. Судаарыстыбаннай буруйдааччы (борокуруор Наталья Потапова) Доржиевка накаастабыл миэрэ быһыытынан, 5 сыл тургутар болдьохтоох 6 сыл усулуобунайы, үс сылга салайар дуоһунастарга үлэлиир быраабын быһары итиэннэ 100 мөл.солк. суумалаах ыстараап төлүүрү туруорсубута.
Ол эрэн икки сыллаах мучумааннаныы быыһыыр бириигэбэринэн түмүктэннэ. Суут “буруйдааһын ыйыллар кэмигэр Валерий Доржиев дуоһунастаах сирэй буолбатах, ол аата ханнык да тэрийэр-соруйар, административнай-хаһаайыстыбаннай дьайыылары оҥорор кыаҕа суох, итинтэн сиэтэрэн, буруйу оҥоруу састааба суох, быыһыырга” диэн быһаарбыт. Ону ааһан, Валерий Доржиевка реабилитацияланар быраабы биэрбит.
Доржиев күндү «бэлэҕэ»
Манна даҕатан эттэххэ, Бурятия Норуодунай Хуралын дьокутаата Валерий Доржиев дьыалатын көрүү ааспыт сыл алтынньы 5 күнүттэн саҕаламмыта. Дьокуускай куорат дьаһалтатын баһылыгын урукку солбуйааччыта РФ Холуобунай кодексатын 290-с ыст. 6-с чааһынан, ол эбэтэр, ураты бөдөҥ кээмэйдээх бэриги түүрэйдээн туран ылыыга уорбаланан тутуллубута.
Силиэстийэ оччолорго сабаҕалаабытынан, Доржиев 2008 сыллаахха мэр солбуйааччытын дуоһунаһыгар үлэлии олорон, биир коммерческай тэрилтэ дириэктэриттэн бэрик көрдөөбүт. Тэрилтэ уставной капиталын өлүүтүн аҥарын саҕа суумалааҕы. Дириэктэр бэрик биэрбэтэҕинэ, хонтуруоллуур уорганнары ыытан бэрэбиэркэлэтиэм диэн суоһурҕаммыт. Инньэ гынан, дириэктэр бэрик биэрэргэ күһэллибит. Ити кэнниттэн чунуобунньук ол “бэлэхтэппит” өлүүтүн аймаҕын аатыгар суруттарбыт. Доржиев ити дьайыытынан коммерческай тэрилтэҕэ 54 мөл.солк. тахса суумалаах материальнай хоромньуну оҥорбут диэн силиэстийэ сабаҕалаабыта.
Барыллааһын силиэстийэ кэмигэр Валерий Доржиев бастаан 1 №-дээх Силиэстийэлиир изоляторга хаайыллыбыта. Онтон доруобуйатын туругунан дьиэтээҕи хаайыыга таһаарыллыбыта. Кэлин хааччахтыыр миэрэтэ ханна да барбат баппыыскаҕа уларыйбыта.
Силиэстийэ бара турар кэмигэр РФ Силиэстийэлиир кэмитиэтин Саха сиринээҕи управлениетын салайааччыта Олег Мезрин Валерий Доржиевка өссө биир ыстатыйанан холуобунай дьыала тэрийбитэ. РФ Холуобунай кодексатын 286-с ыст. 3-с чааһын “в” пуунунан, ол эбэтэр дуоһунас боломуочуйатын аһара баран, ыар содулга тиэрдии бэлиэтэ баарынан. Инньэ гынан, Доржиев икки ыстатыйанан буруйдаммыта.
Биир дойдулаахтара өйөөбүттэрэ
Санатар буоллахха, бу дьыала барыллааһын силиэстийэтин кэмигэр хамсааһын бөҕөтө буолбута. Чуолаан, Доржиев ойоҕо Татьяна Бахлаева айдааны тардан, быраабы көмүскүүр идэлээх дьоҥҥо уонна федеральнай чунуобунньуктарга сурук бөҕөтүн суруйбута. Ол суруктарыгар кини эрин дьыалатыгар иҥэн-тоҥон быһаарсалларыгар, доруобуйата мөлтөҕүнэн силиэстийэлиир изолятортан таһааралларыгар көрдөспүтэ.
Улан-Удэ куоракка Валерий Доржиевка анаммыт пресс-конференция тэрийбиттэрэ. Пресс-конференцияҕа тыл эппит сорох дьонмеценат хаайыллыытын бэйэтин тус иэдээнин курдук ылыммытын биллэрбитэ. Икки күн буолан баран, аны Улан-Удэ куоракка Доржиевы көмүскүүр миитин буолбута. Быһата, биир дойдулаахтара Валерий Доржиев буруйа суоҕар хара маҥнайгыттан итэҕэйбиттэрэ.
Дьыалата суукка көрүллэрэ кэлбитигэр, Доржиев адвокаттара дьыаланы көрүүнү Бурятияҕа көһөттөрө сатаабыттара. Онуоха СӨ Үрдүкү суута хадатаайыстыбаны үөрэтэн көрөн баран, аккаастыырга диэн уураах таһаарбыта.
Вера МАКАРОВА.
Ааптар хаартыскаҕа түһэриитэ.
“Саха сирэ” 2016 сыл от ыйын 14 күнэ.