Бу күннэргэ Өймөкөөн улууһун Томтор нэһилиэгэр Улуу Кыайыы 75 сылын көрсө Өйдөбүнньүк уонна Албан аат, Саха сиригэр — Дойдуга бэриниилээх буолуу сылларын үөрүүлээхтик аһыы тэрээһинэ буолан ааста.
edersaas.ru
Суолталаах тэрээһини Дьокуускайдааҕы Култуура уонна ускуустуба кэллиэһин III кууруһун устудьуона Константин Гарифуллин туруорбут «Дьоруой оҕолор» испэктээҕэ аста. Театрализованнай көстүү — эдэр киһи диплом иннинээҕи туруоруута.
Испэктээҕи көрө кэлбит дьон үксэ — орто саастаах дьон. Кинилэр Лёня Голиков, Зина Портнова, Федя Клюев, Муся Пинкензон курдук дьоруой пионердары оҕо саастарыттан истэн, кинилэр хорсун быһыыларыгар иитиллибит буолан, испэктээҕи ис истэринэн ылыннылар.
Бостонуопкаҕа Томтор орто оскуолатын оҕолоро уонна нэһилиэк ыччата кыттыыны ыллылар.
«Хас биирдиилэрэ турукка киирэн, оруолларын олус бэркэ арыйдылар» диэн олохтоохтор испэктээк кэнниттэн батсаап бөлөхтөргө сиһилии ырыттылар.
Кырдьык, ыччаттар Аҕа дойду сэриитин тиэмэтин чугастык ылынан көрдөрүүлэрэ, кинилэр бостонуопкаларыгар аныгы ыччаттар кыттыылара — бу буолар Ийэ дойдуга бэриниилээх дьону иитэн таһаарыы биир холобура.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсааптан.