Дьокуускайга “Бэргэн” спортивнай комплексыгар (дириэктэр уонна кылаабынай судьуйа Марк Ефимов) Саха Өрөспүүбүлүкэтин норуотун хаһаайыстыбатын үтүөлээх үлэһитэ, Орто Халыма улууһун бочуоттаах гражданина, улуус дьаһалтатын баһылыгынан үлэлээбит Михаил Николаевич Винокуров кэриэһигэр спортиҥҥа күрэхтэһии буолан ааста.
М.Н.Винокуров сааһыт бастыҥа буоларынан, спортинг диэн спорт саҥа көрүҥэр өрөспүүбүлүкэ күрэхтэһиитигэр тиийэ күрэхтэспитэ. Кини волейбол, бильярд, дуобат курдук көрүҥнэргэ эмиэ кыахтаахтык кыттара.
Алтынньы 25 күнүгэр Михаил Николаевич баара эбитэ буоллар, 65 сааһын туолуохтаах этэ. Кини Орто Халыма улууһун аҕа баһылыгынан иккис эрэ сылын үлэлии сылдьан, ыарахан ыарыыттан 2007 сыллаахха тохсунньу 17 күнүгэр биһиги кэккэбититтэн туораабыта.
Буолан ааспыт спортинг күрэхтэһиитигэр 20 ытааччы кытынна. Бэрт көхтөөх уонна тыҥааһыннаах киирсии түмүгүнэн бириистээх миэстэлэри Михаил Николаевич биир дойдулаахтара үллэһиннилэр. Ол курдук, бастакы миэстэни Максим Винокуров, үһүс миэстэни Александр Винокуров ыллылар. “Сахабулт” тэрилтэттэн 76 саастаах Федор Иванов “Саастаах ытааччы”, 1-кы Хаҥалас нэһилиэгиттэн төрүттээх Алексей Явловскай “Саамай эдэр кыттааччы” номинацияҕа тигистилэр.
М.Н.Винокуров элбэх доҕордооҕо. Кини сырдык кэриэһигэр буолбут сэргэх күрэхтэһиигэ Саха сиригэр уонна Орто Халыма улууһугар биллэр улахан салайааччылар Владимир Афанасьевич Григорьев, Николай Макарович Парников, Олег Ильич Кондратьев, Василий Алексеевич Слепцов, Петр Алексеевич Винокуров, Яков Егорович Филиппов уо.д.а. кыайыылаахтарга анал бириистэри туруордулар. Доҕордорун Михаил Николаевич туһунан ахтан тыл эттилэр.
Күндү киһилэрин кэриэһигэр кэргэнэ Нина Спиридоновна, оҕолоро, бииргэ төрөөбүттэрэ, чугас аймахтара тэрийбит спортинг күрэхтэһиитэ санаа хоту сатанан, бэрт үрдүк тэрээһиннээхтик барда. Орто Халыма улууһун уонна 1-кы Хаҥалас нэһилиэгин дьаһалталарыгар, оскуолаҕа бииргэ үөрэммит доҕотторугар, булка-аска бииргэ сылдьан истиҥник санаспыт табаарыстарыгар, аймахтарыгар уонна “Бэргэн” комплекс дириэктэрэ Марк Ефимовка – Михаил Николаевич дьиэ кэргэнэ улахан махталын тиэртэ.
Акулина КОЛЕСОВА