Дьокуускайга сүрэх-тымыр киинин тутуу саҕаланна

Ааптар: 
Бөлөххө киир:

Дьокуускайга сүрэх-тымыр киинин тутуу саҕаланан, бастакы сыбаайата түстэ. 150 куойкалаах аҕыс этээстээх дьиэни 2021 сылга үлэҕэ киллэриэхтэрэ. Быйыл атаҕа түһүө уонна цокола тутуллуо, ону тэҥэ саҥа тутууну ыытар туһугар Сэргэлээх шоссетын оройуонугар баар мас дьиэлэри көтүрүөхтэрэ. Тустаах эбийиэк Уһук Илин экэнэмиичэскэй киин бырагырааматыгар киирэр.

Дойдубут атын эрэгийиэннэригэр курдук өрөспүүбүлүкэбитигэр сүрэх-тымыр ыарыыларын кыһалҕата сытыытык турар. 2021 сыл бүтүүтэ саҥа кардиологическай киини арыйдахпытына, бу Уһук Илин үрдүнэн оборудованиенан толору таҥыллыбыт уонна үрдүк тиэхиньийэлиэгийэлээх кардиодиспансер буолуоҕа”, — диэтэ өрөспүүбүлүкэ баһылыга Айсен Николаев.

Өрөспүүбүлүкэтээҕи кардиологическай диспансер дириэктэрэ Күндүл Иванов этэринэн, Саха сиригэр хаан эргиирин ыарыыларыттан өлүү үрдүк көрдөрүүлээх уонна аҥаарын кэриҥин ылаллар. “Инсультар уонна инфарктар ойуччу миэстэни ылаллар, ол эрээри кэнники кэмҥэ коронарнай уонна аритмическай соһуччу өлүү ахсаана элбээтэ. Хаан эргиирин ыарыыларыттан уопсайа 8 тыһыынча киһиттэн 4,5 тыһыынчата күн сириттэн туоруур”, — диэн кини бэлиэтээтэ.

Сүрэх-тымыр киинэ сүрэххэ эрэ буолбакка, хаан эргииригэр сыһыаннаах бары уорганнарга – сүрэххэ, мэйиигэ, тымырга эндоваскулярнай хирургияҕа аныгы технологиялары олоххо киллэриэхтээх.

Күндүл Иванов саҥа кииҥҥэ ыарыһахтарга тупсаҕай усулуобуйа тэриллиэ диэтэ. Ол курдук, санузеллаах биирдии-иккилии миэстэлээх палааталарга интэриниэтинэн, тэлэбиидэнньэ өҥөтүнэн туһаныахха сөп. Баларга уоту кэмчилиир технология туһаныллыаҕа.

Өрөспүүбүлүкэ доруобуйа харыстабылыгар миниистирэ Елена Борисова этэринэн, бу киин сылга 200 киһини быыһыаҕа уонна 2300 эпэрээссийэни оҥоруоҕа.

150 куойкалаах аҕыс этээстээх дьиэни тутууга федеральнай үптэн 4,5 млрд солкуобай көрүллүбүтэ. Кэлэр нэдиэлэҕэ эргэ мас дьиэлэри көтүрүөхтэрэ, бу дьиэлэр олохтоохторун хайы-үйэ көһөрбүттэрэ.

Санаайа Иванова.

СИА.

+1
0
+1
0
+1
0
+1
0
+1
0
+1
0
+1
0