Быйыл онус төгүлүн ыытыллар “Хаарыан хампа…” тыйаатыр бэстибээлигэр куонкуруска киирбит испэктээктэри көрүү кулун тутар 2 күнүттэн саҕаламмыта.
Тэрийээччилэринэн РФ Култууратын министиэристибэтэ, СӨ Театральнай диэйэтэллэрин сойууһа уонна СӨ Култууратын министиэристибэтэ буолаллар.
Бэстибээлгэ Саха сирин тыйаатырдара кэнники икки сыл иһигэр туруорбут саамай бастыҥ 14 испэктээктэрэ көрдөрүллэллэр.
Түмүк уонна Х “Хаарыан хампа…” театральнай бириэмийэни туттарыы, кыайыылаахтары үөрүүлээхтик наҕараадалааһын кулун тутар 27 – Тыйаатыр аан дойдутааҕы күнүгэр ыытыллыаҕа.
Биллэрин курдук, куонкурус 12 номинациялаах. Сүрүннэрэ – “Бастыҥ испэктээк”, “Бастыҥ дьахтар оруола”, “Бастыҥ эр киһи оруола”, “Бастыҥ сценограф”, “Бастыҥ көстүүм худуоһунньуга”, о.д.а. Маны таһынан түөрт анал бириис баар.
Быйыл аан бастаан, интэриниэт-куоластааһын түмүгүнэн кыайыылаах тахсыбыт бастыҥ испэктээккэ “Көрөөччүлэр билиниилэрэ” бириэмийэ туттарыллыаҕа.
Бэстибээли көҕүлээччи, П.А.Ойуунускай аатынан Саха академическай тыйаатырын артыыстара, “Хаарыан хампа…” саҕаланыан иннинэ, ол гынан баран, дьүүллүүр сүбэҕэ куонкуруска киирбит «Төлкө» испэктээги көрдөрөн баран, үгэс быһыытынан, үс биригээдэнэн сааскы биир ыйдаах гостуруолга айаннаабыттара. Тыйаатыр күнүн көрсө бука бары түмсүөхтэрэ. Быйылгы гостуруол дойдуга Тыйаатыр сылыгар ананар.
Саха тыйаатыра куонкуруска режиссер Сергей Потапов “Мин доҕорум Гамлет” испэктээгинэн кыттар. Биллэрин курдук, бу испэктээк 25-с үбүлүөйдээх “Көмүс мааска” Национальнай бириэмийэҕэ түһэриллибитэ.
Оттон А.С.Пушкин аатынан Нуучча академическай тыйаатыра куонкуруска А.Куприн “Яма” сэһэнинэн режиссер Анна Бабанова туруорбут “Очи черные” инсценировкатынан кытынна. Бу музыкальнай-драматическай испэктээк тыйаатырга сылы быһа ситиһиилээхтик барда.
Салгыы ким ханнык айымньытынан куонкуруска кыттарын афишаттан, баһаалыста, билсиҥ.
Татьяна МАРКОВА, «Саха сирэ» хаһыат, edersaas.ru
СИА уонна тыйаатыр фондатыттан хаартыскалар туһанылыннылар.