Дьокуускай управаларыгар 880 лиитэрэ дезинфекциялыыр сириэстибэни босхо тиксэрдилэр
Саха сирин Ил Дархана Айсен Николаев бу нэдиэлэ бүтүөр диэри Дьокуускай куораты дезинфекциялыырга сорудахтаабыта. Ыам ыйын 29 күнүгэр ОДьКХ министиэристибэтэ, ОДьКХ, «Водоканал» уонна «Бигэ» тэрилтэлэр Дьокуускай куорат управаларыгар 880 лиитэрэ 5 %-наах натрий гипохлорита растворун босхо түҥэттилэр.
ОДьКХ министиэристибэтин кэтээн көрүүтүнэн, өрөспүүбүлүкэ 34 оройуонугар уонна 2 куоратыгар элбэх кыбартыыралаах 8 255 дьиэҕэ дезинфекция оҥоһуллар эбит. Маны таһынан, уопсастыбаннай уонна дьиэ таһынааҕы сирдэр сууйуллуохтаахтар.
Паромнары, навигацияны дезинфекциялыырга Тырааныспар уонна суол хаһаайыстыбатын министиэристибэтигэр 500 лиитэрэ сириэстибэ тиксэриллибит.
Амма, Үөһээ Бүлүү, Горнай, Кэбээйи, Мэҥэ Хаҥалас, Нам, Таатта, Уус Алдан, Хаҥалас, Чурапчы оройуоннарыгар уонна Дьокуускайга 12 000 лиитэрэ натрий гипохлорита тиксэриллибит.
«Ил Дархан сорудаҕын чэрчитинэн, министиэристибэ ОДьКХ, «Водоканал» уонна «Бигэ» тэрилтэлэри кытта дезинфекциялыыр сириэстибэлэри түҥэттэ. Өрөбүллэргэ үлэ күүскэ ыытыллыаҕа», — диэн ОДьКХ министиэристибэтин тустаах департаменын салайааччы Вячеслав Долгунов иһитиннэрдэ.