Дьокуускай таһынааҕы бөһүөлэктэр олохтоохторо осеменатор Вера Силинаҕа махтаналлар
Сүрүн дохуот үүтү уонна эти туттарыыттан эрэ киллэриллэр буолан, тэрээһиннээх да хаһаайыстыбалар, кэтэх да ыаллар сүөһүлэрин боруодатын тупсара, ынаҕы эрдэ төрөтөн, ыанар кэмин уһата сатыыллар.
edersaas.ru.
«Сахаагроплем» судаарыстыба бүддьүөтүн тэрилтэтин (салайааччы Алексей Жирков) чэрчитинэн үлэлиир 300 техник-осеменатортан биир саамай уопуттаахтара уонна бастыҥ көрдөрүүлээхтэрэ Дьокуускай куорат таһынааҕы Марха бөһүөлэгэр олорор Вера Силина буолар.
Төрүт олохтоох нуучча кыыһа 1976 с. Дьокуускайдааҕы тыа хаһаайыстыбатын техникумун бүтэрэн, «Дьокуускай» сопхуоска осеменаторынан ананыаҕыттан олоҕун бу эйгэҕэ анаата. Идэтин үрдэтэн, бэтэринээр быраас үөрэҕин бүтэрбитэ. 1980-с сылларга техник-осеменатордар Бүтүн Сойуустааҕы күрэхтэһиилэригэр ситиһиилээхтик кыттан, өрөспүүбүлүкэ чиэһин көмүскээбитэ. Бу сыллар усталарыгар кини үлэтин уопутун өрөспүүбүлүкэҕэ киэҥник тарҕатта, элбэх ыччаты бэйэтин идэтигэр үөрэттэ. Ол курдук, араас улуустартан хомуллан техник-осеменатор куурсугар үөрэнэр эдэр дьоннор Вера Владимировнаҕа сылдьаннар, кини хайдах үлэлиирин көрөллөр-истэллэр, туохха ордук болҕомтотун уурарын билсэллэр, быһата, осеменатор үлэтин ис кистэлэҥин үөрэтэллэр. Бу Айыыһыт тэҥэ эйэҕэс-сайаҕас Далбар хотуну кытары дуоһуйа кэпсэтэн-ипсэтэн, астынан тарҕаһаллар итиэннэ дойдуларыгар тиийэн таһаарыылаахтык үлэлии-хамсыы сылдьаллар.
— Вера Владимировна үтүө суобастаах үлэтин түмүгэр, Дьокуускай куорат таһынааҕы Марха, Сыырдаах, Тулагы уонна Капитоновка ыалларын ынахтара кытараабаттар. Билиҥҥи туругунан номнуо 100-тэн тахса ынаҕы сиэмэлээтэ. Бу сыыппара баҕар, кимиэхэ эрэ сэмэй курдук иһиллэрэ буолуо. Ол эрээри, бэйэ-бэйэлэриттэн тэйиччи турар бөһүөлэктэр биирдии-иккилии ынахтаах ыалларын кэрийэн, сиэмэлиир сыанан аҕаабат. Холобур, Капитоновкаҕа 1,5 тыһ. солк. төлөөн, таксинан тиийэн сиэмэлиир! Уопуттаах осеменатор үрдүк бородууксуйаны биэрэр боруодаларга үлэлиир буолан, кини сиэмэлээбит сүөһүлэрэ төрөлкөй уонна үүттээх буолаллар. Хаһаайкалар ынахтарын ахсыттан, ньирэйи эмтэрбити таһынан, күннэтэ 16-20 лиитэрэ үүтү ыаннар, дохуот киллэринэр буоланнар, өр сыллартан бииргэ үлэлиир осеменатордарыгар махталлара улахан, – диир «Сахаагроплем» искусственнай сиэмэлээһини тэрийиигэ эппиэттээх исписэлииһэ Татьяна Протопопова.
Раиса Сибирякова, «Саха сирэ» хаһыат, edersaas.ru