Дьокуускай киин болуоссатыгар хомуньуустар миитиннээтилэр...
Олох-дьаһах - Эдэр саас

Дьокуускай киин болуоссатыгар хомуньуустар миитиннээтилэр

Муус устар 22-гэр, бассабыыктар сирдьиттэрэ Владимир Ульянов-Ленин төрөөбүт күнүгэр, Арассыыйа Федерациятын Коммунистическай баартыйатын Саха сиринээҕи салаатын салалтата Дьокуускай куорат киин болуоссатыгар миитин тэрийдэ.  Халлаан туран биэрэн, эмэн дьон син муста сатаата.

Роман Попов, «Саха сирэ» хаһыат

Тыл этээччилэр куолуларынан, баттаммыттар-атаҕастаммыттар ааттарыттан салайар былааһы саралаатылар,  дойду баайын апчарыйар олигархтар үрдүлэригэр үҥүү-үөрбэ уоттаах тылларын куттулар, саат-суут остуолбатыгар хараҕалаатылар, коммунальнай төлөбүр, ас-үөл сыаната ыарыырын утардылар, “Сэрии оҕолорун” туһунан сокуону ылынары модьуйдулар. Миитини салайан ыыппыт өрөспүүбүлүкэ хомуньуустарын баһылыга Виктор Губарев быыбар иннинэ биир санаалаах, көрүүлээх уопсастыбаннай холбоһуктары, түмсүүлэри күүһү түмэргэ ыҥырда.

Быыбар чугаһаабыт сибикитэ илэ-чахчы биллибит – миитиннэри, мунньахтары тутуспутунан кэрийэ сылдьан араатардыыр атастар баар буолбуттар. Ол эрэн, тыллара-өстөрө тупсан кэлбэт буолар эбит. Арай куоластара чөллөрүйэн иһэрин кулгаахтаах эрэ бэлиэтиирэ баар суол.

Хомуньуустуур санааларын ыһыкта иликтэр, кинилэрдиин биир санаалааахтар чэбдик тыалга тэлибирии оонньуур кыһыл былаахтар анныларыгар туран, сааскы күҥҥэ сыламнаатылар, доҕотторун-атастарын кытта тото-хана сэлэстилэр. Эдэрдэрин эргитэн хас биирдии араатардыыр табаарыһы “Ураа” хаһыынан атаардылар, бэйэлэрэ да билбэттэринэн ааһан иһэр эдэр дьон селфилэригэр сонун күөн буоллулар.

Роман Попов, «Саха сирэ» хаһыат

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

6 + восемнадцать =