Мунньуунан үлүһүйэр дьикти дьарыктаахтары сырдатабыт. Инстаграм социальнай ситим нөҥүө булбут коллекционердарбытын кытта билсиҥ.
50 устуука бейсболкалаахпын
Иннокентий Луковцев, Саха тыйаатырын артыыһа:
- Мин бейсболка муспутум биэс сыл буолла. Бу бэргэһэни оҕо эрдэхпиттэн сөбүлээн кэтэбин. Оччолорго ийэм бэлэхтээбит «USA» диэн суруктаах уонна хотой ойуулаах бейсболкаах этим, ону куруук дойдубар тиийдэхпинэ көрдүүбүн даҕаны булбаппын. Наһаа күндүтүк саныыбын, буларым буоллар, оҕо саас мүччүргэннээх сырыыларыттан өйдөбүл буолан хаалыа этэ буоллаҕа. Кэлин бэлиэтээбиппинэн, омук дойдуларыгар араас фестивалларга, гостуруолларга сылдьыбытым тухары наар дойду ааттаах бейсболка атыылаһан иһэр эбиппин. Онон устунан коллекция буолан хаалбыта. Билигин аймахтарым, бииргэ үлэлиир дьонум омук дойдутуттан куруук бейсболка кэһиилээх кэлэллэр. Коллекциябыттан сөбүлээбиппин кэтэн, күн аайы даҕаны уларыта сылдьыахпын сөп. Бейсболкаларбын дьиэм биир эркинигэр тоһоҕолорго ыйаабытым, биэс уонча ахсааҥҥа тиийдэ быһыылаах. Саамай күндүтүк олимпийскай оонньууларга, Россия сүүмэрдэммит хамаандаларыгар анаан оҥоһуллубут бейсболкаларбын саныыбын.
Коллекциябын үбүлүөйбэр көрдөрүөм
Ньургуйаана Сыроватская, тамада:
- Мин коллекциям – дьикти коллекция. Сылдьыбыт омук дойдум, улууһум, нэһилиэгим ахсын үҥкүүлээн иһэбин, ону доҕотторум видеоҕа усталлар. Барытыгар биирдик хамсанабын, этэргэ дылы, фирменнэй үҥкүүм диэн ааттыыбын. Бастаан Кытайга сылдьаммын үҥкүүлээбитим. Ханнык дойдуга сылдьарым билиннин диэммин суруктаах аартык аттыгар үҥкүүлүү сатыыбын. Кэлин үҥкүүлэрим видеоларын барытын холбоон, монтажтаан, коллекциябын түмүөм. Билиҥҥитэ биэс уонча үҥкүүлээхпин. Суотабай төлөпүөммэр барыта баппат, онон коллекциябар анаан флеш-карта атыыласпытым. 50 сааспын туолар үбүлүөйдээх киэһэбэр килиип оҥорон көрдөрүөм.
Дьол тааhын көрдүүбүн
Евгения Иванова, Таатта олохтооҕо:
— Мин үүттээх өрүс таастарын мунньабын. Бастаан ийэм Туйаара Трофимовна мунньан саҕалаабыта. Кыра сылдьан, сөтүө кэмигэр дьонум биэрэккэ куруук таас көрдүүллэрэ. Онтон интэриэһиргээммин бэйэм көрдүүр, мунньар буолан барбытым. Ол курдук, бастакы тааспытын 16 сыл анараа өттүгэр Амма өрүс кытылыттан булбуппут. Өрүстэр, үрэхтэр таастара уратылаһаллар. Холобур, бу Өлүөнэ тааһа, Алдан тааһа диэн киһи тута араарар. Маннык тааһы булан, үүтүн нөҥүө баҕа санааҕын эттэххинэ туолар дииллэр. Оннук тааһы норуокка дьол тааһа диэн ааттыыллара буолуо. Билигин сүүсчэкэ таастаахпын. Барыларын анал тэриэлкэҕэ мунньабын. Быйыл Еланкаттан биир тааһы булан коллекциябын хаҥаттым. Ханна даҕаны быыстапкаҕа эҥин кыттан көрө иликпин.
Киндергэ куруук үөрэбин
Елизавета Иванова, М.К. Аммосов аатынан ХИФУ преподавателэ:
- Мин 1994 сылтан оччолорго саҥа тарҕаммыт «Киндер-сюприз» сакалаат оонньуурдарын мунньан саҕалаабытым. Хайа баҕарар оҕо бу сакалааты олус күүтэр. Ол курдук, миэхэ дьонум, аймахтарым куораттан куруук «Киндэрдээх» кэлээччилэр. Бастакы оонньуурум сиэрэй дьүһүннээх массыына билигин даҕаны баар. Билигин барыта биэс сүүсчэ буоллаҕа буолуо, хоруопкаҕа мунньа сылдьабын. Ыалдьыттар кэллэхтэринэ көрдөрөөччүбүн. Балтыларым, бырааттарым куруук ымсыыраллар, ол эрээри коллекция оонньуурдара диэннэр былдьаспаттар. «Киндер» оонньуурдарын элбэх киһи мунньар буолуохтаах, кинилэри кытта билсиэхпин баҕарабын. Бэйэбэр суох оонньуурдары көрдүүбүн, табыллар буоллаҕына, атастаһабын. Бу соторутааҕыта хас даҕаны бэйэбэр суох бегемоттары булаттаабытым. Маны таһынан, өссө омук дойдуларын магниттарын мунньабын. Номнуо холодильникка баппат, онон эмиэ туспа хоруопкаламмыттара. Уонча сыл иһигэр түөрт сүүс устууканы мустум.
Мантан да атын арааһынайы мунньар дьон элбэхтэр. Киһи баҕардаҕына хаһан баҕарар, тугу баҕарар мунньан саҕалыан сөп.
Кэлэр нүөмэрдэрбитигэр биирдиилээн билиһиннэрэн иһиэхпит. Оттон эн тугу мунньаҕын? Дьикти дьарыккын хаартыскаҕа түһэрэн уонна кылгастык кэпсээн, биһиэхэ ыыт. Эдэр коллекционердар, түмсүҥ!
Айтана АММОСОВА, edersaas.ru