Бэҕэһээ Бүлүү бөлөх улуустарыгар буолан ааспыт этиҥнээх ардах Ньурба улууһун Дьиикимдэтигэр улахан хоромньуну аҕалла.
edersaas.ru
Баһылык Варвара Сухаринова иһитиннэрбитинэн, чаҕылҕан кэмигэр уот лиинийэтэ быстан, 11 сүөһү уокка оҕустаран өллө.
Үөдэй нэһилиэгин баһылыга Мария Николаева быйыл Марха өрүс эҥээр улаханнык курааннаабытын этэр.
— Бу сайын устатыгар биһиэхэ бэҕэһээ эрэ ардаата. Өрүү Малдьаҕар, Хатыы, Маалыкай диэки түһэн, ол нэһилиэктэр өссө ууга барыах курдук буоллулар. Биһиги эҥээр курааннаан, от да, сир аһа да куурда-хатта. Бэҕэһээҥҥи күүстээх этиҥнээх чаҕылҕан биһиги нэһилиэкпитин таарыйбата. Ардаҕын эрэ түһэрдэ. Бүлүү Эбэ тардар буолан, этиҥэ ырааҕынан ааста, — диэн кэпсиир Мария Пудовна.
Бүлүү бөлөх күүстээх этиҥнээх ардаҕа, сэрэйдэххэ, бүгүн киэһэ киин куоракка кэлэн түһэрэ буолуо. Онон оҕуруотчуттар сэрэниҥ.
Елена ПОТОЦКАЯ, «Cаха сирэ» хаһыат, edersaas.ru
Хаартыска — батсааптан.