Коронавирус эпидемията аан дойдуга тарҕаммытынан, омук дойдуларыттан кэлбит дьон булгуччу икки нэдиэлэ дьиэлэригэр «изоляцияҕа» олоруохтаахтар. Бүгүҥҥү туругунан, кулун тутар 5-20 күннэригэр омук дойдуларыттан кэлбит 2841 киһи дьиэҕэ бүгэн, хааччахтанан олорор.
edersaas.ru
Суруналыыс Егор Карпов соторутааҕыта Таилантан кэлбитэ. Кини балаһыанньата хайдаҕын туоһуластыбыт:
— Түүн кэлбитим, сарсыарда колл-кииҥҥэ эрийэн, Таилантан кэллим диэн тылламмытым. Онно сурунан баран «бэйэҥ поликлиникаҕар эрийэн бырааста ыҥыр» диэбиттэрэ. Ыалдьыбыт сибики суох даҕаны буоллаҕына, ыҥырыахтаах эбиккин.
Үһүс поликлиникаҕа эрийбитим, сотору буолан баран, быраас кэлэн эмиэ дааннайдарбын суруйан барбыта. Сарсыарда атын быраас кэлэн муннум иһиттэн, айахпыттан »мазок», тымырбыттан хаан анаалыһа ылбыта уонна 14 хонук дьиэҕэр олор диэбитэ. Күн аайы эрийэн хайдах туруктаахпын туоһулаһаллар.
Туга-ханныга биллиэр диэри дьиэҕэ олорбут ордук, син биир улахан эппиэтинэс буоллаҕа. Ону өйдүүбүн. Бастатан туран, чугас дьоммутун харыстыахтаахпыт. Билиҥҥи үйэҕэ кэпсэтэргэ, көрөн олорон алтыһарга төлөпүөн, интэриниэт баар. Куруук хаама, сүүрэ-көтө сылдьыбыт киһиэхэ дьиэҕэ хаайтаран олоруу эрэйдээх соҕус да, тулуйуохха сөп, — диэн Егор кэпсээтэ.
Ангелина Васильева, »Саха сирэ» хаһыат, edersaas.ru