Бу күннэргэ + «Эргиэн» IV өрөспүүбүлүкэтээҕи биисинэс-оонньуу интэриниэт ситиминэн ыытыллыбыт күрэс кыайыылаахтарынан Чурапчы улууhун сүүмэрдэммит хамаандата буолла.
edersaas.ru
Бу туһунан дьыалабыай оонньууну сүрүннээччи, оскуола оҕолоругар «Эргиэн» биисинэс-хамсааһыны төрүттээччи, үөрэхтээһин бырайыактарын түһэ Семен Посельскай бу курдук кэпсиир:
— Дьыалабыай оонньууну өйүүр «Бичик» национальнай кинигэ кыһатын өйөбүлүнэн оҕолор бэйэлэрэ толкуйдаан оҥорон таhаарбыт «Өйүмэй» сахалыы кроссвордарын хомуурунньуга таҥыллан, бэчээттэнэн атыыга тахсыыта – сыралаах үлэбит түмүгэ. «Эргиэн» бизнес-оонньуу сүрүн соругунан оскуола үөрэнээччилэрин толкуйдаабыт биисинэс-идиэйэлэрин олоххо киллэрии уонна сайыннарыы буолар. Интэриниэт ситимигэр анал хештегынан киирэн, оҕолор туох тосхолу торумнаан таhааралларын уонна ханнык хайысханан тэтимнээхтик үлэлииллэрин көрүөххэ сөп.
Сахалыы кроссворд бырайыагын оҥоруу олунньуттан саҕаламмыта. Чурапчы улууhунааҕы Үөрэх управлениетын исписэлиистэрин уонна «Бичик» кинигэ кыhатын үлэһиттэрин өйөбүллэринэн Чурапчытааҕы гимназия, Бахсы орто оскуолатын уонна Дириҥ орто оскуолатын үөрэнээччилэрэ, уопсайа 9 оҕо айымньылаахтык үлэлээтэ.
Кэрэхсэбиллэҕэ баар, оҕолор сыстыганнаах дьаҥ өрө туран, дьиэҕэ олоруу эрэсиимин кэмигэр тэйиччиттэн олорон үөрэнэр кэмнэригэр, интэриниэт ситиминэн үлэ хаамыытын быспакка, тэтимнээхтик үлэлээн, хомуруунньугу таһаарыыга үлэлэстилэр. Бу туһунан сиһилии «Саха сирэ» хаһыат кэлэр нүөмэригэр сырдатыахпыт.
Елена ПОТОЦКАЯ, «Саха сирэ» хаһыат, edersaas.ru