Денис Белозеров: «Сөптөөх быһаарыыны кэмигэр ылартан элбэх тутулуктаах»
Бырабыыталыстыба Бэрэссэдээтэлэ Денис Белозеровка от ыйын 19 күнүгэр Ыксаллаах быһыыны-майгыны сэрэтиигэ уонна туоратыыга, баһаартан куттал суох буолуутун хаачыйыыга хамыыһыйа видеосилиэктэринэн сүбэ мунньаҕа буолан ааста.
edersaas.ru
Саха Өрөспүүбүлүкэтигэр ойуур пуондатын ыраах уонна суола-ииһэ суох сирдэрэ ойуур баһаарынньыктарын сулууспатын кэтэбилигэр итиэннэ Рослесхоз-ИСДМ куосмастан мониторинын хонтуруолугар сылдьаллар. Ойуур баһаара турар кутталлаах кэмэ саҕаланыаҕыттан өрөспүүбүлүкэҕэ 864 ойуур баһаара (1 398,5 тыһ. га) бэлиэтэммит. Ону умуруорарга 2 тыһ. 607 киһи үлэлээбит, 227 тиэхиньикэ тардыллыбыт. От ыйын 19 күнүнээҕи чахчынан, уон үс сиргэ: Алдан, Дьааҥы, Кэбээйи, Ленскэй, Ньурба, Бүлүү, Горнай, Хаҥалас улуустарыгар уонна Дьокуускай куоракка турбут ойуур баһаарын бохсор үлэ ыытыллар. Бу үлэҕэ барыта 380 киһи, ол иһигэр 78 ойууру сиринэн харыстыыр сулууспа үлэһитэ, 254 парашютист уонна десантник-баһаарынньык, 9 лесничество үлэһитэ, 39 олохтоох нэһилиэнньэттэн мобилизацияламмыт киһи, итиэннэ 18 араас тиэхиньикэ тардыллыбыт. Баһаары утары ураты эрэсиим уон муниципальнай тэриллиигэ: Абый, Алдан, Дьааҥы, Эбээн Бытантай, Уус Маайа, Ленскэй, Нам, Сунтаар, Ньурба улуустарыгар уонна киин куоракка баар. Муниципалитет икки ардынааҕы ыксаллаах быһыы-майгы эрэсиимэ Дьааҥыга уонна Муомаҕа биллэриллибит.
Мунньаҕы түмүктүүрүгэр Денис Белозеров былырыыҥҥы сылга тэҥнээтэххэ, ойуур баһаардарын умуруоруу үлэтэ арыый тупсарыллыбытын бэлиэтээтэ. Улуустар уонна нэһилиэктэр баһылыктарыар баһаартан сэрэхтээх буолууга улахан болҕомтону уурарга, мэлдьи хонтуруолга тутарга, ойуур баһаара турар түбэлтэтигэр быһаарыылары суһаллык ылынан, уоту бохсуу үлэтин тэрийэргэ эттэ. «Сөптөөх быһаарыыны кэмигэр ылартан итиэннэ эбии күүһү тардартан биһиги үлэбит көдьүүһэ улахан тутулуктаах», — диэтэ вице-премьер диэн Ил Дархан уонна Бырабыыталыстыба дьаһалтатын пресс-киинэ иһитиннэрэр.
Раиса Сибирякова, «Саха сирэ» edersaas.ru