Таатта улууһун Игидэй нэһилиэгин туһунан «Дэбдиргэ холкуостара сэрии сылларыгар» кинигэ күн сирин көрдө.
Кинигэни хомуйан оҥорбут киһинэн Гизелла Попова буолар. Ааптар кинигэни суруйуу, хайдах хомуйан оҥорбутун туһунан санаатын үллэһиннэ:
—Кинигэбин икки сыл устата бэлэмнээтим. Таатта улууһун архыыбыгар хаста эмэ кырынан, сурунан, хасыһан үлэлээтим. Мин олорор түөлбэм туһунан хаһыспытым ыраатта. Маныаха архыып үлэһиттэрэ Лариса Слепцова, Мария Ефимова сүбэлээн-амалаан, наадалаах матырыйааллары буларбар күүс-көмө буолбуттара. Мин, дьиҥэ, ыстатыйаларым цикллэрин мунньан туспа таһаарар санаалааҕым, онуоха былырыын нэһилиэкпит оскуолатыгар Иннокентий Дягилев диэн саҥа дириэктэр ананан кэлбитэ. Кини миэхэ муспут матырыйаалларбынан кинигэ таһааттарарбар сүбэлээбитэ. Эргэ хаартыскалары хомуйуу, архыып матырыйаалларын сөргүтэн суруйуу, бэчээттээһин курдук үлэлэри барытын оҥорорбор учууталлар, оҕолор көмөлөстүлэр. Ону сэргэ, бэтэрээннэр сэбиэттэрин салайар Аргунова А.К., өр сылларга тыа хаһаайыстыбатыгар таһаарыылаахтык үлэлээбит Маркова А.Н., Марков В.Ф. сүбэ-ама буолан, 5-с кылаас үөрэнээччитэ Лира Аргунова көмпүүтэргэ бэчээттээн улаханнык абыраатылар. Онон нэһилиэгим дьоно-сэргэтэ бу кинигэ тахсыытыгар бары күргүөмүнэн көмөлөстүлэр.
Кинигэм аныгы олох тэтиминэн араас видеосюжеттары, оннооҕор киинэни көрдөрөр. Элбэх сэдэх хаартыскалар уонна фотограф Альберт Попов хаартыскалара киирдилэр. Кинигэм тахсыытыгар «Тааттаавтодор» ААУо генеральнай дириэктэригэр Бочонин И.И., «Сайдам» издательство редакторыгар Лыткина М.П. уонна оскуолам кэлэктиибигэр махталым муҥура суох. Бэл, Шотландияттан кытта өйөөтүлэр. Кинилэр баар буоланнар бу кинигэ күн сирин көрдө. Онон бар дьоммор этиэм этэ, аҕа көлүөнэ олорон ааспыт олоҕун туһунан ыччат хайаан да билиэхтээх. Мин бу кинигэбин «Түмсүү» холкуос бэрэссэдээтэлигэр, эһэбэр Максимов Иван Иннокентьевич -Торуой Уйбаан сырдык кэриэһигэр анаатым. Кинигэм тахсыытыгар көмөлөспүт дьоҥҥо барыларыгар махтанабын. Бары этэҥҥэ буолуҥ!
Ульяна Захарова.
