«Далбар Хотун» куонкурус кэрэһиттэрэ буолуҥ

Бөлөххө киир:

«Далбар Хотун» өрөспүүбүлүкэтээҕи куонкурус тыа сиригэр олорор, уйгуну уһансар элбэх оҕолоох, иллээх-эйэлээх ыал ийэтин аата өрө тутулларын, кини оҕону иитиигэ үтүө холобура, хаһаайка быһыытынан сатабыла, талба талаана, үлэһит, уопсастыбанньык быһыытынан ситиһиитэ көстөрүн ситиһэр сыаллаах-соруктаах ыытыллар, – диэн «Сахабэчээт» автономнай тэрилтэ  генеральнай дириэктэрэ Филипп Пестряков куонкуруска анаан ыытыллыбыт пресс-конференцияны саҕалаата.

Надежда ЕГОРОВА, «Саха сирэ» хаһыат, edersaas.ru

Пресс-конференцияҕа быйылгы куонкуруска кытта кэлбит 7 кэрэ аҥаар, «Далбар Хотун» сурунаал кэлэктиибэ уонна суруналыыстар кытыннылар. Быйылгы куонкуруска улуустарыгар улахан тургутууну ааһан, бастыҥынан ааттаммыт кэрэ-мааны Галина Васильева (Ньурба улууһа, Антоновка с.), Людмила Иванова (Нам, Кириэс Кытыл с.), Туйаара Егорова (Мэҥэ Хаҥалас, Суола с.), Мария Иванова (Амма с.), Екатерина Котоконова (Үөһээ Бүлүү, Ороһу с.), Дария Старостина (Таатта, Чычымах), Ия Федорова (Өлөөн с.) кэллилэр.

Куонкурус түһүмэхтэрэ:

Олунньу 25 күнүгэр «Сэргэлээх уоттара» Култуура киинигэр ыытыллар куонкурус бастакы түһүмэҕэр кыттааччылар бэйэлэрин, дьиэ кэргэттэрин, үлэлэрин-хамнастарын, дьарыктарын туһунан кэпсиэхтэрэ. Айар куонкуруска ыллаан, үҥкүүлээн, сөбүлүүр музыкальнай тэриллэригэр оонньоон талааннарын көрөөччүлэр дьүүллэригэр таһаарыахтара. Кэрэ көстүү уонна аһымал аукцион түһүмэҕэр киэһээҥи мааны былаачыйаларын кэтэн сцена устун кынталдьыһа хаамсыахтара.

Кыттааччылар бэйэлэрин дойдуларыгар түһүмэхтэр түмүктэринэн кинилэргэ иҥэриллибит үрдүк ааттардаах төннүөхтэрэ. Ол курдук, 7 киһилээх дьүүллүүр сүбэ хас биирдиилэригэр маннык ааттары иҥэриэҕэ:

«Талба Хотун» – атаҕар турбут аныгы, байылыат хаһаайыстыба хотуна;

«Хотун Ийэ» – саамай элбэх оҕолоох кыттааччы;

«Айыы Хотун» – аһымал аукцион түмүгүнэн элбэх үбү киллэрбит кыттааччы;

«Иэйии Хотун» – чаҕылхай айар талааннаах кыттааччы;

«Мааны Хотун» – саамай кэрэ сахалыы таҥастаах-саптаах кыттааччы;

«Уран Хотун» – бастыҥ оҥоһуктардаах кыттааччы.

Ону сэргэ, былырыын саҥа киллэриллибит түһүмэх – интерактивнай куоластааһын олунньу 17-24 күннэригэр СИА сайтыгар ыытылла турар. Элбэх куолаһы хомуйбут кыттааччы «Көрөөччү биһирэбилэ» номинация аатын сүгүө уонна сыаналаах бирииһинэн наҕараадаланыа.

Быйылгы уратылар

Куонкурус сыл аайы далааһына кэҥээн иһэр. Ол курдук, быйыл хоту, киин улуустартан, Бүлүү бөлөхтөн уонна илин эҥэртэн талыллан кэллилэр.

Быйыл кэккэ уларытыылар киллэрилиннилэр. Бастатан туран, кыттааччылар 50-тан тахсыбыт, эгил-тэгил саастаах кэрэ аҥаардар буолуохтаахтар. Иккиһинэн, кинилэр үстэн итэҕэһэ суох оҕолоохторо болҕомтоҕо ылылынна. Үсүһүнэн, кыттааччылар дьиэ кэргэттэрэ кэтэх хаһаайыстыбалаахтара учуоттанна.

Үгүс дьон биһирэбилин ылбыт улахан тэрээһин ыытыллар сыала-соруга Саха сирин Далбар Хотунун талыынан эрэ муҥурдаммат, ис хоһооно киэҥ уонна улахан суолталаах.

Холобур, куонкурус кэмигэр 7 бастыҥ хаһаайка астаан аҕалбыт бүлүүдэлэрэ атыыга туруоруллуохтара. Онтон киирбит харчы ыалдьар, инбэлиит оҕо төрөппүттэригэр туттарыллыаҕа. Манна даҕатан эттэххэ, былырыын биир бастыҥ бүлүүдэ 66 тыһыынча суумаҕа турбута. Уопсайынан, куонкурус кэмигэр киирбит 400-тэн тахса тыһыынча уу харчыны дьон-норуот көрөн олордоҕуна ыалдьар оҕо ийэтигэр туттарыы олус долгутуулааҕа.

Куонкуруһу тэрийээччилэр уонна ыраахтан-чугастан кэлбит кэрэ аҥаардар олунньу 25 күнүгэр куонкуруһу көрө, долгутуулаах уонна умнуллубат түгэннэр кэрэһиттэрэ буоларгытыгар ыҥыраллар.

Көрөөччүлэргэ киирии билиэттэринэн уонна «Сахабэчээт» таһаарар «Чолбон», «Полярная звезда», «Далбар Хотун», «Забота-Арчы» сурутааччыларыгар анаан лотерея оонньонуо.


ЫСПЫРААПКА:

  • Бастакы куонкурус 2007 с. кулун тутар 5 күнүгэр А.Е.Кулаковскай аатынан Култуура киинигэр ыытыллыбыта. Куонкурус кыайыылааҕа Хаҥалас улууһун Нөмүгүтүттэн кэлбит 5 оҕолоох ийэ, предприниматель Лидия Афанасьевна 100 тыһыынча солкуобай бирииһинэн наҕараадаламмыта.
  • Иккис куонкурус 2009 с. кулун тутар 8 күнүгэр эмиэ А.Е.Кулаковскай аатынан Култуура киинигэр тэриллибитэ. Кыайыылаах – Хатаска олорор 5 оҕолоох ийэ Галина Габышева 100 тыһыынча солкуобайы туппута.
  • Үһүс куонкурус 2011 с. кулун тутар 3 күнүгэр «Сэргэлээх уоттара» Култуура киинигэр элбэх көрөөччү биһирэбилин ылбыта. Кыайыылаах – Мэҥэ Хаҥалас Төҥүлүтүн 3 оҕолоох ийэтэ Марфа Иванова «Туймаада-Лизинг» туруорбут «Синтай» дьоҕус тыраахтарын ылан, дойдутугар өттүк харалаах, илии тутуурдаах төннүбүтэ. Бу сылтан ыла кыайыылаахтар бары «Синтай» тыраахтарынан наҕараадаланан кэллилэр.

Куонкурус генеральнай партнера «Мас Арт» ХЭО, лотерея генеральнай партнера «Алдьыс Строй» тутуу хампаанньа, спонсордар «Алмаасэргиэнбаан» АО, Саха сирин аҕаларын лигата, «Азиатскай-Тихоокеанскай баан» ААО бэрэстэбиитэллэрэ дьиэ кэргэн туруктаах буоларын өйүүр куонкуруска киллэрэр кылааттарын кэпсээтилэр. Филипп Пестряков махтанан эппитин курдук, кинилэр көмөлөрө, өйөбүллэрэ суоҕа буоллар, бу кириисис кэмигэр маннык киэҥ далааһыннаах тэрээһин ыытыллара тохтотуллуон эбэтэр икки сылга биирдэ эрэ  буолуон сөбө. Быйылгы кыайыылаах эмиэ кыра тыраахтарынан наҕараадаланыаҕа.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0