Дьахталлар уопсастыбаннай тэрилтэлэрэ сомоҕолоһоллор...
Олох-дьаһах

Дьахталлар уопсастыбаннай тэрилтэлэрэ сомоҕолоһоллор

Сомоҕолоһуу сылынан сибээстээн бүгүн өрөспүүбүлүкэтээҕи Дьахталлар уопсастыбаннай тэрилтэлэрин уонна  Социальнай үлэһиттэр сойуустарын бэрэстэбиитэллэрэ көрсөн, бииргэ үлэлээһин хайысхаларын торумнаатылар.

edersaas.ru

СӨ Дьахталлар уопсастыбаннай тэрилтэлэрин сойуустарын бэрэссэдээтэлэ, РФ Дьахталларын сойууһун бюротун чилиэнэ Анжелика Андреева тэрээһин туһунан бу курдук билиһиннэрдэ:

Социальнай үлэһиттэр күннэрин көрсө көрсүһүүбүтүн өрөспүүбүлүкэтээҕи Дьахталлар сойуустарын Президиумун чилиэнэ, Дьокуускай куорат Дууматын дьокутаата, киин куораттааҕы нэһилиэнньэни социальнай хааччыйыы кэлим киинин дириэктэрэ, СӨ Социальнай үлэһиттэр сойуустарын салайааччыта Наталья Пахомова көҕүлээн тэрийдэ. 

Дьокуускай к. социальнай тэрилтэлэрин салайааччыларын кытта бииргэ үлэлээһин хайысхатын ырыттыбыт. Биһиги дьахталлар, ханнык да да эйгэҕэ үлэлээтэрбит, күүспүтүн бииргэ түмэн, биир сүбэнэн сылдьарбыт ордук. Ол курдук, икки уопсастыбаннай сойуустар кыттыһан үлэлииргэ кэскиллээх бырайыактары толкуйдуохпут, суолталаах тэрээһиннэри бииргэ кыттыһан ыытыахпыт. Социальнай үлэһиттэр сойуустара бу күһүн Узбекистан  уонна Филиппины судаарыстыбаларыгар тиийэн,  дьахталлар  социальнай тэрилтэрин үлэлэрин кытта билсиһиэхтээхтэр эбит.  Ол онно биһиги сойууспутун эмиэ кыттыһарга ыҥырдылар. Ити курдук араас ис хоһоонноох кэккэ былааннаах этиилэри бэйэ-бэйэбититтэн эбэн, бииргэ үлэлээһиҥҥэ илии баттаһыахпыт. 

Өрөспүүбүлүкэтээҕи инбэлиит ыччаттары медицинскэй-социальнай реабилитациялыыр техникум-интернат дириэктэрэ Рина Винокурова:

Дьахталлар уопсастыбаннай тэрилтэлэрэ Сомоҕолоһуу сылынан сибээстээн бииргэ үлэлээһини тэрийэрбит — сонун хамсааһын. Национальнай бырайыактары олоххо киллэрии саамай үгэнэ. Үгүспүт граннарга киирсэн кыайдыбыт. Онон сотору кэминэн үбүлээһин көрүллэн, үгүс бырайыактары олоххо киллэрии саҕаланыаҕа. Онно бэйэ-бэйэбитин өйөнсөн үлэлээтэхпитинэ үгүһү ситиһиэхпит, — диэн санаатын тиэртэ.

Өрөспүүбүлүкэтээҕи Оҕо реабилитационнай киинин салайааччыта Зинаида Максимова:

Маннык формальнайа суох, дьахталлар чэйдии олорон санаабытын атастаһарбыт, сонун бырайыактары толкуйдуурбут — олус бэрт көрүҥ. Онон биирдэ-иккитэ буолбакка, бэйэ-бэйэбитин кытта чаастатык көрсөр буолуоҕуҥ, — диэн дьүөгэлэрин ыҥырда.

СӨ Социальнай үлэһиттэр сойуустарын салайааччыта Наталья Пахомова көрсүһүүгэ эдэр социальнай үлэһиттэргэ болҕомтотун туһаайда:

Манна номнуо уонтан тахсалыы сыл үлэлээбит эдэр кэллиэгэлэрбит бааллар. Кинилэр  социальнай эйгэҕэ уопуттаах салайааччы буола үүннүлэр. Онон бииргэ үлэлээһиҥҥэ кинилэр сонун көрүүлэригэр эрэнэбит. 

Ити курдук, Саха сирин дьахталларын икки бөдөҥ уопсастыбаннай тэрилтэлэрин актыбыыстара Сомоҕолоһуу сылыгар бэйэлэрин сэмэй кылааттарын киллэрэн, өрөспүүбүлүкэ сайдыытыгар улахан суолталаах үлэни ыытарга туруннулар.

Елена ПОТОЦКАЯ, «Саха сирэ» хаһыат, edersaas.ru

Хаартыскаҕа ааптар түһэриитэ.

 

2
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

20 + 10 =