Экология, айылҕаны туһаныы уонна ойуур хаһаайыстыбатын министиэристибэтэ баһаартан сэрэхтээх буолууга, уот туруутун бохсууга мониторины тиһигин быспакка оҥорор.
edersaas.ru
«Авиалесоохрана» судаарыстыбаннай бүддьүөт тэрилтэтин эрэгийиэннээҕи сулууспата иһитиннэрэринэн, ыам ыйын 6 күнүнээҕи туругунан, Дьааҥы улууһугар 595 гектар иэннээх сиргэ 28 уот турар куттала (термотуочука) баара бэлиэтэммит, онуоха төрүөтүнэн көҥүлэ суох өртөөһүн буолбут.
Онон, министиэристибэ Дьааҥы улууһун дьаһалтатыгар сурук ыыппыт. Өссө төгүл санатан эттэххэ, Арассыыйа Федерациятын «Баһаары утары эрэсиим туһунан» уурааҕар олоҕуран, тыа хаһаайыстыбатыгар туһаныллар уонна саппаас сирдэргэ кур оту-маһы уматыы, сыһыыга-хонууга, эгэ, ойуурга дуо, кулуһун оттуу букатын бобуллар. Бу ирдэбили тутуспат буолуу норуот хаһаайыстыбатыгар уонна дьон доруобуйатыгар, бас билэр баайыгар-дуолугар улахан хоромньуну оҥорор диэн Экология, айылҕаны туһаныы уонна ойуур хаһаайыстыбатын министиэристибэтин пресс-киинэ иһитиннэрэ.
Раиса Сибирякова, «Саха сирэ» хаһыат, edersaas.ru