Бэс ыйын 3 күнүгэр федеральнай ханааллар цифровой биэриигэ көһүөхтэригэр диэри үс нэдиэлэ курдук хаалла. Ааспыт сылтан өрөспүүбүлүкэ олохтоохторун 95 бырыһыана 20 теле-ханаалы көрөр уонна араадьыйа үс ханаалын истэр кыахтаннылар.
“Бу күннэргэ Саха сирин сүүһүнэн олохтоохторо даачаларыгар көһүөхтэрэ. Үгүстэр дьиэлэригэр тэлэбиисэрдэрэ кабелынан эбэтэр цифровой биэриигэ холбоммут буолуохтаахтар. Отон даачаларга үгэс курдук антенна көмөтүнэн үлэлиир эргэ тэлэбиисэрдэр турааччылар, — диэн өрөспүүбүлүкэ инновацияҕа, цифровой сайдыыга уонна инфокоммуникационнай технологияларга миниистирэ Анатолий Семенов бэлиэтээтэ. – Ол иһин бэс ыйын 3 күнүн күүппэккэ эрэ даачаҕа тахсар куорат бары олохтоохторугар цифровой приставканы уонна антеннаны ылынаргытыгар сүбэлиибин.”
Цифровой тэлэбиидэнньэ босхо, сүрүн усулуобуйата – DVB—T2 стандарты тэлэбиисэр хабар буолуохтаах. 5-тэн ордук сыл үлэлээбит тэлэбиисэрдэр бу стандарты хаппаттар, ол иһин итилэргэ цифровой приставканы уонна дециметровай антеннаны атыылаһыахтааххыт. Балары дьиэҕэ туһаныллар тиэхиньикэ маҕаһыыныгар эбэтэр өрөспүүбүлүкэ почтатын 133 салаатыгар атыылаһыаххытын сөп. Приставка сыаната наһаа ыарахан буолбатах – 990 солкуобай, антеннаҕа киирэр икки хайаҕастаах приставка арыый ыарахан, ити тэлэбиисэри пульт көмөтүнэн цифровойтан антеннанан хабарга көһөрөр. Бу опция федеральнай ханааллары эрэ буолбакка, өрөспүүбүлүкэтээҕи “Якутия24” эбэтэр “Саха” НКИК теле-ханаалларын көрөөччүлэргэ сөптөөх.
Оттон даачаҕа антеннаны таларга болҕомтолоохтук сыһыннаһыахха диэн “СӨ араадьыйанан уонна тэлэбиидэнньэнэн биэрэр киинэ” РТРС филиалыгар бэлиэтииллэр. “Даача учаастактара тэлэбиидэнньэ быыскатыттан тэйиччи буоланнар, уулусса антенната табыгастаах буолуоҕа, — диэн кэпсээтэ филиал кылаабынай инженерэ Юрий Горчаков. – Антеннаны төһө кыалларынан үрдүк гына уонна телебашня диэки хайыһыннаран туруорар ордук. Маннык туруордаххытына, сигнал сүтүө суоҕа, аналогтан уратыта диэн сигнал кэлбэтэҕинэ экраҥҥа мэһэй үөскүүр, “цифраҕа” хартыына сүтэн хаалар”.
Өскөтүн антенна сөп түбэспэтэҕинэ, маҕаһыыҥҥа уларытыахтаахтар эбэтэр сыанатын төннөрүөхтээхтэр. Цифровой тэлэбиидэнньэҕэ холбонор туһугар босхо 8-800-350-14-14төлөпүөнүнэн эрийиҥ. Call-киин үлэлиир режимэ үлэ күнүгэр 9-тан 18 чааска диэри. Өрөбүллэргэ уонна бырааһынньык күннэригэр тута федеральнай суһал линияҕа аадырыстанар.