Спорт бэтэрээнэ, СӨ үтүөлээх тренерэ, Дьааҥы улууһун бочуоттаах гражданина, хас да кинигэ ааптара Петр Васильевич Портнягин бэйэтэ отучча сыл муспут спорка сыһыаннаах коллекциятынан 2004 сылтан мусуой тэрийэн киирэн барбыта. 2014 сылга Верхоянскайга саҥа спортивнай саала үлэҕэ киирэн, мусуой саҥа дьиэҕэ көһөрүллүбүтэ. Онон билигин Дьааҥы спорка албан аатын уонна спортивнай тустуу тустарынан мусуой экспонаттара – саала иккис этээһигэр биэс хоһунан көрдөрүүгэ тураллар.
Мусуой түөрт разделлаах. Бастакыта – көҥүл тустууга олимпийскай чөмпүйүөннэр, манна Саха сириттэн Олимпиадаҕа кыттыбыт бөҕөстөрбүт эбии киллэриллэн биэрбиттэр. Иккис раздел – өрөспүүбүлүкэ номоххо киирбит бөҕөстөрө – спорт үтүөлээх маастардара, норуоттар икки ардыларынааҕы кылаастаах спорт маастардара, ССРС уонна Россия спорка маастардара. Үһүс раздел Дьааҥы улууһун бастыҥ спортсменнарын кэпсиир. Оттон төрдүс — “Азия оҕолоро” оонньуу уотун Дьааҥы улууһун Киһилээх хайатыттан уматыыга уонна эстафетаҕа анаммыт.
Мусуой экспоната күннэтэ эбиллэ турар, Петр Васильевич этэринэн, билигин үс тыһыынчаттан тахсыбыт. Ол курдук, 400-чэкэ спорт туһунан кинигэ уонна буклет, 100-чэкэ спортивнай кубоктар (бары кэриэтэ ханна, туох иһин ылыллыбыттара сурулла сылдьар), 200-чэкэ мэтээл, 300-чэкэ вымпел, ону тэҥэ видеокассеталар, диискэлэр, чөмпүйүөннэр аалай лиэнтэлэрэ, спортивнай сурунааллар, рекламалыыр афишалар, биллиилээх спортсменнар грамотолара, дипломнара, 1000-тан тахса сэдэх хаартыскалар, 500-чэкэ спортивнай значоктар, араас сувенирдар, бэйджиктэр кырыы-кырыытынан быыстапкаланан көрдөрүүгэ туруоруллубуттар.
Верхоянскайдааҕы мусуойу – аан дойдуга биир саамай хотугу Спорт мусуойун быһыытынан сыаналыахха сөп. Кырдьык да матырыйаала элбэҕэ, баайа ыччаты физкультураҕа уонна спорка уһуйууга, историяны үөрэтиигэ, билиигэ улахан тирэх буолар. Энтузиаст-бэтэрээн бу саҕалааһынын өссө даҕаны кэҥэтэр былааннаах. Петр Васильевич спорду пропагандалааһыҥҥа улахан дьыаланы оҥорбутугар махтал!
Верхоянскай куоракка тиийдэххитинэ, П.В.Портягин мусуойун халты хаамымаарыҥ, кэмсиниэххит суоҕа.
Петр ПАВЛОВ.
Борис ПАВЛОВ хаартыскаҕа түһэриилэрэ.