Бу күннэргэ Дьааҥы оройуонугар ситэриилээх былаас отчуота буола турар. СӨ бырабыыталыстыбатын бэрэссэдээтэлин солбуйааччы Денис Белозеров салайааччылаах оробуочай бөлөх Сайдыы сэлиэнньэтин олохтоохторун кытары көрсүһүүтүгэр, дьон-сэргэ улаханнык долгуйан туран саҥа оскуола тутуллуутун чопчуластылар диэн СӨ Ил Дарханын уонна Бырабыыталыстыбатын пресс-сулууспатыттан иһитиннэрдилэр.
Алын сүһүөх кылаас оҕолоро уларытыллан оҥоһуллубут оҕо саадыгар, оттон үрдүкү кылаастар — сельпоҕа үөрэнэллэрэ этилиннэ. Маныаха өрөспүүбүлүкэ Инвестиционнай бырагырааматыгар Сайдыы сэлиэнньэтигэр 120 миэстэлээх оскуоланы тутуу 2022 сылга былааннанан турарын иһитиннэрдилэр.
Кыһалҕаны түргэнник быһаарарга Денис Белозеров уонна кинини кытары отчуокка кэлбит өрөспүүбүлүкэ үөрэххэ, наукаҕа итиэннэ экономикаҕа министиэристибэтин бэрэстэбиитэллэрэ типовой бырайыагынан 90/40 миэстэлээх оскуола-саады тутарга этии киллэрдилэр. Ону кинилэр маннык түгэҥҥэ, эбийиэги тутуу болдьоҕо эрдэлээн биэрэр диэн быһаардылар.
Онон, аны, билигин сайдыылар бу барыйааннартан хайатын талалларын уопсай мунньаҕынан толкуйдууллар. 2022 сылга оскуола тутулларын күүтэллэр дуу, 90/40 миэстэлээх типовой бырайыактаах оскуоланы тутууга сөбүлэһэллэр дуу. Иккис барыйааны таллахтарына, эбийиэги тутуу 2020 сылтан саҕаланыахтаах диэн этиллэр.
Маны сэргэ, нэһилиэк олохтоохторо оскуоланы дьоҕус кэмпилиэктээхтэр ахсааннарыгар киллэрэргэ уонна үөрэх тэрилтэтигэр оҕолору таһарга суолга куттал суох буолуутун ирдэбилигэр толору эппиэттиир көлөнү биэрэллэригэр көрдөстүлэр. Туруорсуу, ыйытыы итинэн муҥурдаммата. Ол курдук, кэтэх дьиэлэри киин ититэр тиһиккэ холбооһуну, өрүс суолунан сылдьыыны чөлүгэр түһэриини, уу тырааныспарынан дьон кэлэрин-барарын тэрийиини, Оһохтоох учаастакка фельдшерскэй-акушерскай пуун тутуллуутун, о.д.а. туруорустулар, санааларын үллэһиннилэр.
СӨ Ил Дархан уонна Бырабыыталыстыба пресс-сулууспата
Хаартыскалар: СӨ Ил Дархан уонна Бырабыыталыстыба пресс-сулууспата