«Чысхаан сулустара» бырайыак оҕо талаанын арыйар...
Олох-дьаһах

«Чысхаан сулустара» бырайыак оҕо талаанын арыйар

Өймөкөөн улууһун Өймөкөөн нэһилиэгэр быйыл тыыл бэтэрээннэрэ Марфа Кривошапкина уонна Семен Вензель ааттарынан «Чысхаан сулустара» диэн оҕо айар куонкуруһа алтыс сылын ыытылынна.

edersaas.ru

Мин тыыл бэтэрээннэрин ааттарынан куонкурус баарын истэ илик буолан: «Туох сыаллаах-соруктаах тэрээһиний?» — диэн интэриэһиргээтим. Бу туһунан куонкуруһу тэрийээччи Хара Тумуллааҕы «Кэнчээри» оҕо саадын иитээччитэ Марианна Тырылгина маннык кэпсиир:

Тыыл бэтэрээннэрэ Марфа Кривошапкина уонна Семен Вензель ааттарынан «Чысхаан сулустара» оҕо талаанын арыйар бырайыагы мин ийэм, педагогическай үлэ бэтэрээнэ, СӨ үөрэҕириитин туйгуна Мария Семеновна Вензель ийэтин Марфа Никитична Кривошапкина уонна аҕатын Семен Саввич Вензель ааттарынан олохтообута. Эбэм ыанньыксыт, эһэм булчут эбиттэр. Аҕа дойду сэриитин саҕана эһэм Семен Саввич Томторго аэропорт тутуугар үлэлээбит.

Нэһилиэкпитигэр талааннаах оҕо олус элбэх. Ол эрээри оҕо эрэ барыта санаата да, араас улуустааҕы уонна өрөспүүбүлүкэтээҕи таһымнаах айар куонкурустарга кыттар кыаҕа суох. Үксүгэр айан суотун төрөппүттэр бэйэлэрэ уйунар усулуобуйалара үөскээн, оҕолор барахсаттар ыраах айан туһунан санаа оҥосторго эрэ тиийэллэр. Ол иһин айар куттаах оҕолор ситиһиилэрин уонна талааннарын бэлиэтииргэ анаан бу тэрээһини ийэбинээн толкуйдаабыппыт. Бириистэри бэйэбит харчыбытыгар ылабыт.

Айар куонкуруска Өймөкөөн нэһилилиэгин оҕото барыта кыттар. Бастакы күн оҕо саадыттан 20 оҕо кыттыбыта. Киһи талаана оҕо сааһыттан арыллар дииллэрэ кырдьыгын бу оҕолор толору дакаастаатылар. Кэнсиэргэ кэлбит дьон кырачааннарга ырыаларыгар, үҥкүүлэригэр, хоһоонноругар махтанан, дохсун ытыс тыаһын бэлэхтээтилэр.       

   «Чысхаан сулустара» айар куонкурус Гран-при хаһаайыннарынан Хара Тумуллааҕы «Кэнчээри» оҕо саадын иитиллээччилэрэ буоллулар. Кинилэр «Биһиги фуболистарбытыгар ситиһиини!» диэн бэртээхэй ис хоһоонноох үҥкүүнү толорон кыайдылар. Бириэмийэни айар куонкуруһу олохтообут педагогическай үлэ бэтэрээнэ Мария Вензель туттарда.

           

Иккис күн оскуола оҕолоро күөн күрэстэстилэр. Айар куттаах дьон диэх курдук, кулууп саалатыгар оҕолор араас матырыйаалтан оҥорбут бэйэлэрин оҥоһуктарын, баайыы, тигии иистэрин, уруһуйдарын быыстапка оҥорон тэниттилэр. Айар дьоро киэһэ түмүгүнэн Гран-при хаһаайкатынан 4 кыл. үөрэнээччитэ Люба Канаева буолла. Кини «Сибэккилэр» диэн ырыата көрөөччүлэр куттарын тутта. Улахан кылаас оҕолоругар «Сулустар» диэн вокальнай ырыа бөлөҕө (сал. Саргылаана Сивцева) «Сулустар» ырыаларынан бэлиэтэннилэр.

Дьэ, ити курдук педагогическай үлэ бэтэрээнэ Мария Вензель кыыһынаан Марианна Тырылгиналыын тыыл бэтэрээннэрэ Марфа Никитична Кривошапкина уонна аҕатын Семен Саввич Вензель ааттарын үйэтитэн, бэртээхэй бырайыагы олоххо киллэрбиттэр. Сыл аайы тэрээһиннэрэ араас бэлиэ сылларга ананаллар. Быйылгы тэрээһин Арассыыйаҕа Оҕо саас уон сылыгар анаммыт.

Бу маннык суолталаах тэрээһиннэр кинилэргэ анаммыт буолан, оҕолор барахсаттар онно кыттарга төһөлөөх үөрэллэрэ уонна долгуйаллара буолуой? Кэнэҕэс кэмигэр талаанара арыллан, аатырбыт ырыаһыт дуу, үҥкүүһүт буолан тахсан: «Мин бастакы сулустаах чааһым «Чысхаан сулустарыгар» саҕыллыбыта…», — диэн ахтыахтара турдаҕа.

Оҕо көмүскэлин аан дойдутааҕы күнүнэн Өймөкөөн нэһилиэгин оҕолорун талааннарын арыйар бырайыак ааптардарыгар махтал тылларын бастыҥын аныыбыт. Оҕо ситиһиитин, талаанын өйүүр маннык тэрээһиннэр элбии турдуннар!

 

Елена ПОТОЦКАЯ «Саха сирэ» хаһыат, edersaas.ru

Хаартыскаҕа Марианна Тырылгина түһэриитэ.

 

2
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

4 × три =