Бүгүн Өймөкөөн нэһилиэгэр «Чысхаан оскуолата» аһыллан үлэлээтэ.
edersaas.ru
Бу тэрээһини Н.О. Кривошапкин аатынан орто оскуола кэлэктиибэ, Култуура уонна искусство Арктическай института тэрийэн ыыталлар. Тэрээһини академик, социология наукатын доктора Ульяна Винокурова уонна Польшаҕа Варшава университетыгар үлэлиир культурология доктора Күннэй Такасаева сүрүннүүллэр.
Бүгүҥҥү тэрээһини Арктическай институт доцена Елена Атласова салайар. «Чысхаан оскуолатыгар» Томтор орто оскуолатыттан, Томтордооҕу Оҕо искусствотын оскуолатыттан уонна Өймөкөөн орто оскуолатыттан уопсайа 50-ча оҕо кытта сылдьабыт.
Мин Томтор орто оскуолатын кылааһын үөрэнээччитэ Мадлена Сивцеваны кытта кэпсэттим.
— Мадлена, эн бэйэҥ үлэлэргин эбии аҕалбыккын дии?
— Мин «Мэрилин Монро мэтириэтэ», «Бүтэһик фантазия», «Ыйдаах түүн», «Лаби» диэн уруһуйдарбын аҕалбытым.
— Дьиэтээҕи сорудаҕынан «Лаби» туһунан номох толкуйдуохтаах этибит. Эн «Лабиҥ» туһунан кэпсээ дуу.
— Мин Лабим таас хаспахтан тахсыбат кыыл. Кини Лабыҥкыр күөлүн аттыгар баар хайа хаспаҕар олорор. Сылга биирдэ эрэ, ону даҕаны, ый туолбут күнүгэр тахсар. Лаби муммут дууһаларга ый суһумунан олоххо таба суолу аһан биэрэр.
— Эн бу тэрээһини сөбүлээтиҥ дуо?
— Олус бэркэ табыллан арыллан үлэлээтим. Киһи кыаҕын аһарыгар наһаа үчүгэй лаборатория эбит.
Мадленаны кытта кэпсэтэн баран, үлэлэригэр үлүһүйэ олорор уолаттарга чугаһыыбын.
Өймөкөөн орто оскуолатын үөрэнээччитэ Семен Заровняев «Чысхаан» оскуолатыгар иккис сылын дьарыктанар.
— Семен, эн бу оскуолаттан туохха үөрэнниҥ?
— Араас инструменнары, тэриллэри туттуу кистэлэҥнэрин арыйдым. Биһиги бөлөхпүт кинигэ уурар долбууру уонна Лаби фигуратын фанераттан быһан оҥордубут. Уустук баҕайы үлэ, кыратык сыыстыҥ да, үлэҥ барыта хаалар кутталлаах.
Ити курдук, «Чысхаан оскуолатыгар» кыттыбыт оҕолор бүгүн бэрт элбэҕи биллилэр-көрдүлэр.
Тимур ЕГОРОВ,
Н.М. Заболоцкай-Чысхаан аатынан орто оскуола иһинэн үлэлиир
«Чуурукта» эдэр кэрэспэндьиэннэр постарын юнкора,
8 кылаас үөрэнээччитэ.
Хаартыскаҕа ааптар түһэриитэ.