Чурапчыга Роман Ноговицын аатынан искибиэр арылынна

Бөлөххө киир:

Бэҕэһээ, от ыйын 1 күнүгэр, Байыаннай дьайыылар бэтэрээннэрин күнүгэр  Чурапчы улууһугар Роман Ноговицын аатынан искибиэр арылынна.

«Бүгүн биһиги эйэлээх халлаан анныгар олорорбут иһин турууласпыт дьоҥҥо сүгүрүйэбит. Биир дойдулаахпыт, Дириҥтэн төрүттээх Роман Юрьевич кинилэртэн биирдэстэрэ буолар. Кини олус аһаҕас, үөрэ-көтө сылдьар, элбэх доҕордоох киһи этэ. Аармыйаҕа 1995 сыллаахха ыҥырыллан барбыта. Онтон 1996 сыллаахха Чечняҕа сорудахха сылдьан тыына быстыбыта. Сэриилэспит дьону өйдүү-саныы сылдьыахха», — диэтэ улуус баһылыга Андрей Ноговицын.

Билигин Чурапчы улууһугар байыаннай дьайыылар 44 бэтэрээнэ олорор. Саҥа искибиэр «Куоҕалы» уопсастыбаннай тэриллии, улуус байыаннай дьайыыларын бэтэрээннэрин уонна нэһилиэк дьаһалтатын күүһүнэн оҥоһулунна.

Искибиэр арыллыытыгар Роман Ноговицын ийэтэ Евдокия Петровна Ноговицына, улуус уопсастыбаннаһа уо.д.а. кыттыыны ыллылар. Бу туһунан Чурапчы улууһун дьаһалтатын пресс-сулууспата иһитиннэрэр.

edersaas.ru

+1
0
+1
0
+1
0
+1
0
+1
0
+1
0
+1
0