Бу күннэргэ күөххэ үктэниинэн сибээстээн, олохтоох дьаһалта көҕүлээһининэн эр дьон Чурапчы улууһун Арыылааҕар ытык кырдьаҕастарга дьиэлэринэн сылдьан, бастакы кустары түҥэттилэр.
Кэрэхсэбиллээҕэ баар, бу нэһилиэккэ бастакы куһу түҥэтии үгэскэ кубулуйбут.
— Арыылаах нэһилиэгэр үһүс сылбытын ытык кырдьаҕастарбытыгар, кыайан ыраах баран кустуур кыаҕа суох ыалларга эр дьон кустаабыт булпутуттан кыттыһан түҥэтэбит.
Бастакы кус кэмэ биһиэхэ улахан бырааһынньык. Ол курдук, «Бастакы көҕөн», «Бастакы хаас» диэн анал бириистэрдээхпит. Ону нэһилиэкпит дьоно өргө диэри кэрэ кэпсээн оҥостоллор, — диэн сонунун үллэстэр баһылык Николай Сыромятников. Онон Арыылаахха бастакы куһу амсайбатах киһи суох.
Үтүө үгэс кэнэҕэс ыччаттан ыччакка бэриллэн, «силистэнэн-мутуктанан» барыа буоллаҕа.
Елена ПОТОЦКАЯ, «Саха сирэ» хаһыат, edersaas.ru
А
+1
+1
+1
+1
+1
+1
+1