Чурапчыга “Дьиэҕэр олор — дьиэ кэргэн экэниэмикэтинэн дьарыктан!” бырагыраама дьон-сэргэ биһирэбилин ылыан ылар

Бөлөххө киир:

Тыа хаһаайыстыбатын бородууксуйатын оҥорон таһаарыынан, сүөһү-ас иитиитинэн, оҕуруот аһын олордуунан Чурапчы улууһа өрөспүүбүлүкэҕэ куруутун даҕаны инники күөҥҥэ сылдьарынан биллэр. Ол, нэһилиэнньэ бу дьарыга улууска өйөбүлү ыларын туоһулуур.

«Нэһилиэнньэ дохуотун үрдэтэр туһуттан Чурапчы улууһун дьаһалтата хас да хайысханан анал бырагырааманы олоххо киллэрэр. Бастатан туран, дьон тэпэлииссэҕэ бэйэтигэр оҕуруот аһын хото  үүннэрэригэр анаан, льготалаах, чэпчэки сыаналаах поликарбонатнай тэпэлииссэлэри аҕалыыны тэрийэбит.  Ол курдук, Новосибирскайтан икки рейсинэн 313 тэпэлииссэни аҕалан, собуот бэйэтин сыанатынан нэһилиэнньэҕэ атыылыыбыт», — диир улуус баһылыга  Андрей Ноговицын.

Тырааныспар ороскуотун барытын улуус дьаһалтата уйунар, онон, биир тэпэлииссэ сыаната 14 тыһыынча солкуобайга тэҥнэһэр эбит. Билиҥҥи туругунан 186 тэпэлииссэ хайыы үйэҕэ нэһилиэктэринэн тарҕатыллыбыт. 127 тэпэлииссэни тиэммит өссө биир массыына кэлэрин кэтэһэллэр. Ол туһунан эрэдээксийэҕэ улуус дьаһалтатын пресс-сулууспата иһитиннэрэр.

Нэһилиэнньэ, биллэн турар, салалта өттүттэн бачча өйөбүл баарын өйдөөн, ылынан, сайыҥҥы сезоҥҥа көхтөөхтүк бэлэмнэнэр, наадалааҕын барытын хото сакаастыыр.

Аҕам саастаах дьоҥҥо уонна соҕотох ийэлэргэ анаан, С.А.Новгородов аатынан орто оскуола территориятыгар харабылланар учаастактары биэрбиттэр, кинилэр онно бэйэлэригэр анаан оҕуруот аһын арааһын олордуохтара. Өссө биир үчүгэйэ баар – бу  сирдэр үрэх үрдүгэр тураллар, онон, үүнээйигэ уу кутарга ордук табыгастаахтар.

Кырдьык даҕаны, дьон үөрүүтэ өйдөнөр. Ордук, уопсай дьиэлэргэ олорооччуларга бу олус абыраллаах бырагыраама эбит.

Биһиги дьиэ кэргэн бу иннинэ наар уопсай дьиэҕэ олорон кэлбиппит. Улууспутугар “Хаарбах дьиэттэн көһөрүү” бырагыраамаҕа хапсан, икки этээстээх эргэ мас дьиэбит көтүрүллэн, 2016 сыллаахха толору хааччылыылаах саҥа дьиэҕэ киирбиппит. Онон, улууспутугар махталым улахан. Мин оскуолаҕа учууталлыыбын, икки оҕолоохпун, сиэннэрдээхпин. Биллэн турар, уопсай дьиэҕэ олорор киһи, оҕолорун, сиэннэрин туһугар, бэйэтэ учаастактанан, оҕуруот аһын үүннэриниэн, хаһаайыстыба тэриниэн баҕарар бөҕөтө буоллаҕа. Ол иһин  ипотекаҕа киирэн, эргэ тутуулаах сайылык сирэ ылбытым. Барытын саҥаттан оҥостор наада. Онон, хата бу улууспут дьаһалтата эмиэ өйөөн, “Дьиэҕэр олор — дьиэ кэргэн экэниэмикэтинэн дьарыктан!” анал бырагырааманан удамыр сыанаҕа тэпэлииссэ аҕалан биэрбиттэрэ олус наадалаах, хайҕаллаах суол. Дьэ, сайын устата сиэннэрбин кытта оҕурсуу, помидор, перец, хортуоппуй, онтон да атыны олордон, оҕуруот үүннэриитинэн кыһаллан дьарыктаныам. Бу нэһилиэнньэҕэ улахан өйөбүл буолар. Онон, улууспут баһылыгар Андрей Тимофеевичка, дьаһалта бары үлэһиттэригэр махталым муҥура суох!, — диир С.А.Новгородов аатынан Чурапчы орто оскуолатын алын сүһүөх кылаастарын учуутала Саргылаана Михайловна Жергина.

Маны таһынан, улуус дьаһалтатын көмөтүнэн Нерюнгритээҕи көтөр фабрикатыттан 4100 куурусса аҕалыллар эбит. Бу күннэргэ 1100 куурусса хайыы үйэҕэ кэлбит.  Биир куурусса сыаната 285 солкуобай – дьон хамаҕатык ылар. Итиэннэ, улуус дьаһалтата дуогабардаһан, Хатастааҕы свиноферматтан  өссө 170 сибиинньэ оҕотун аҕалыахтаахтар.

Ити курдук, бу судургута суох, пандемия кэмигэр, чурапчылар дьоҥҥо-сэргэҕэ хайдах көмөлөһөрү олус сөпкө толкуйдаан таһаарбыттар.

“Дьиэҕэр олор — дьиэ кэргэн экэниэмикэтинэн дьарыктан!” пилотнай бырагырааманы олоххо киллэрии – бу бэйэтин подсуобунай, кэтэх хаһаайыстыбатын сайыннарыан баҕалаах дьону өйөөн, кинилэри туохха  наадыйалларынан, арассаадатыгар тиийэ,  кииннэммит, тэрээһиннээх хааччыйыы буолар. Маннык көмө улуус бары нэһилиэктэригэр тиийэ оҥоһуллара кэрэхсэнэр.

Татьяна МАРКОВА.

“Чурапчы улууһа” МТ ыыппыт хаартыскалара.

+1
0
+1
0
+1
0
+1
0
+1
0
+1
0
+1
0