Билигин вирус саҥа көрүҥүнэн сибээстээн, сүрүн болҕомто Дьокуускайга туһаайылынна. Ол эрээри хоту сытар, ыраах улуустарга эмиэ бу куттал суоһуур.
Аллайыахаҕа пандемияны утары бэлэмнэнии күүскэ ыытыллан эрэр. Уопсай быһаарыынан Чокуурдаахха спорт саалатын сабан, онно кыттыгас куортамнаһан олорбут кыра тэрилтэлэри таһааран, инфекционнай балыыһа курдук оҥорон бэлэмнии сылдьаллар.
Бу туһунан Чокуурдаахтан улуустааҕы балыыһа кылаабынай мэдиссиинискэй сиэстэрэтэ Рита Николаевна Слепцова бу курдук иһитиннэрдэ:
— Спорт саала аныгылыы көрүҥнээх, дуустаах, туалеттаах буолан, бу ыксаллаах кэмҥэ тэринэргэ табыгастаах дии санаатыбыт. Билигин улуус балыыһатын күүһүнэн (кыл.быраас Т.Н.Слепцова) бэлэмнээн эрэбит. Биир хоһу палаата курдук бэлэмнээн, реанимация хоһо гына оҥоробут. Щитовой буола сылдьыбыт хоско процедура кэбиниэтэ буолуоҕа. Ону сэргэ ыраас зона, кирдээх зона диэннэр баар буолуохтара. Хаалбыт күннэргэ матараастарга клеенкалары тигиэхпит. Сууйдубут-тараатыбыт. Кытайга бу дьаҥ турбутун туһунан истэн баран, эрдэттэн дьаһанан термометрдэри эҥин сакаастаабытым. Противочумнай көстүүмнэри сакаастаабыппыт кэлиэхтээх.
Ону таһынан интэринээт дьиэтигэр обсерватор курдук бэлэмниэхпит. Онно 20 куойкалаах буолуоҕа. Дьахтарга уонна эр киһиэхэ 8-тыы куойка уонна түөрдү – оҕо киэнэ. Ол да буоллар, бу ыарахан дьаҥ-дьаһах бачча ыраах кэлбэтэ буоллар диэн баҕалаахпыт.
Женни СТРЮКОВА, “Саха сирэ” хаһыат.
Хаартысканы Р.Н.Слепцова ыытта.