Ааспыт 2019 сылга Амма улууһугар тыа хаһаайыстыбатын тус сыаллаах бырагырааматынан, 26 эдэр ыал саҥа дьиэни тутунна, сэттэ сылгы баазата итиэннэ алта хотон үлэҕэ киллэрилиннэ.
edersaas.ru.
Чакыр уонна Сатаҕай нэһилиэктэрин улахан хаһаайыстыбалара “Сайылыктааһын” бырагырааматынан туттубут тутууларыгар быйыл сайын көһүөхтэрэ. Чакырга «Кэскил» хааччахтаммыт эппиэтинэстээх хаһаайыстыба ыанньыксыттара ааспыт күһүн 120 миэстэлээх толору хааччыллыылаах саҥа хотоҥҥо киирэнннэр, үөрэ-көтө үлэлииллэр.
—120 ынах киирэр сүөһү иитэр комплексын тутууну «Хаҥалас Тутуу» ХЭТ (генеральнай дириэктэр Кан Терешкин) Леонид Терешкин салайааччылаах биригээдэтэ от ыйыттан саҕалаабыта, — диир хаһаайыстыба салайааччыта Александр Карманов. – Сайын устата тэтимнээхтик үлэлээн, кыстыгы көрсө саҥа хотоҥҥо киирдибит. Үлэлиир усулуобуйа тупсан, чэпчээн үлэһиттэр үөрүүлэрэ улахан. Сыл түмүгүнэн хаһаайыстыбаҕа барыта 555 ынах сүөһү, ол иһигэр 194 ньирэй, 99 ыччат сүөһү, 28 бургунас, 230 ыанар ынах, икки оҕус, икки ат оҕус баар. Баалабайынан 478 т үүтү ыаммыт, былааммытын 100,17 % толордубут. Икки хотоҥҥо ыанар ынах, икки хотоҥҥо ыччат сүөһү турар. Сорох сүөһүлэрбит Аммаҕа бааллар. Саҥа комплекска 120 ыанар ынаҕы түөрт уопуттаах ыанньыксыт көрөр-истэр. Биригэдьиир Светлана Григорьева үлэһиттэрин сатабыллаахтык салайар. Кыстыахтаах 950 т оппутун Анатолий Баишев биригээдэтэ оттообута. Комплекспыт иккис уочаратын эһиил туттарар былааннаахпыт.
Ыстаарсай ыанньыксыт Амгарита Кириллина 1980 с. оскуоланы бүтэриэҕиттэн, бастаан сопхуоска, онтон манна ыанньыксыттаабыт. Наар эргэ сыбах хотоннорго үлэлээбиппит, бу саҥа хотоҥҥо киирэн абыранныбыт, уу аптамаатынан кэлэр, оту тыраахтар киллэрбитин атырдьаҕынан тарыйан эрэ биэрэбит, ноһуом транспортерунан бара турар. Билигин 25-тии ынахтаахпыт, аны биэстии бургунаһы ылыахтаахпыт, ааспыт сылга 64,1 туонна үүтү ыан, былааммын толорбутум диир.
Бэтэринээр идэлээх Айталина Капитонова Чакырга, Мээндигигэ, Уус Маайаҕа сүүрбэччэ сыл үлэлээн баран, дойдубар төннөн кэлэн, миэстэ баарынан пиэрмэҕэ үлэлии киирбит. Ааспыт сылга 63 туонна үүтү ыан, былаанын толорбут. Маны таһынан бэтэринээр эбээһинэһин сүгэн, сүөһүлэргэ битэмиин биэрэр, төрөөбүт ынах “кэнэҕэскитэ” хааллаҕына көмөлөһөр, ньирэйдэр истэрэ ыарыйдаҕына эмтиир-томтуур. Аттынааҕы хотоҥҥо субан сүөһүлэри көрөр, пиэрмэ үлэтигэр олоҕун анаабыт Семен Иванов саҥа комплекс усулуобуйатын хайгыыр. Хаһаайыстыба сүөһүтэ барыта батар саҥа хотонноро баар буолалларыгар баҕарар.
Алтана Артемьева, «Саха сирэ» хаһыат, edersaas.ru.