Икки нэдиэлэнэн Дьокуускайга Арассыыйа боксаҕа чөмпүйэнээтэ саҕаланыаҕа. Номнуо бэҕэһээҥҥиттэн күрэс кыттыылаахтара Саха сиригэр кэлитэлээн эрэллэр.
Ол курдук, Иркутскай үс киһилээх хамаандата кэлэн, олоҕун булла. Бүгүн Чечня спортсменнара, тириэньэрдэрэ кэллилэр. Балаҕан ыйын 28-гар Дагестан боксердара уонна Арассыыйа үтүөлээх тириэньэрэ Николай Хромов салайааччылаах 70 киһилээх дойду эдэрдэргэ сүүмэрдэммит хамаандата кэлиэҕэ. 28 уонна 30 чыыһылаларга Новосибирскай уобалас, Красноярскай кыраай, Тамбов уобалаһын, Хабаровскай кыраай итиэннэ Москва уобалаһын спортсменнарын күүтэллэр.
Мантан антах итигирдик күннэтэ Дьокуускай аэропордугар Арассыыйа чөмпүйэнээтин кыттыылаахтарын, ыалдьыттарын көрсүөхтэрэ.
Эр дьон ортотугар боксаҕа Арассыыйа чөмпүйэнээтэ Дьокуускайга, “Триумф” Спорт киинигэр алтынньы 12-21 күннэригэр ыытыллыаҕа. Бу рингэ түмүгүнэн Европа чөмпүйэнээтигэр кыттар хамаанда сүүмэрдэниэҕэ. Чөмпүйэнээккэ барыта 425 киһи: 320 спортсмен, 40-тан тахса судьуйа уонна 30 бочуоттаах ыалдьыт кэлэрэ күүтүллэр.
Роман Попов, edersaas.ru
Хаартыска Интэриниэттэн ылылынна