Сунтаартан төрүттээх саха биллиилээх суруйааччыта, бэйиэт, публицист, тылбаасчыт Александра Григорьева-Сандаарыйа “Музыка сфер” диэн айар киэһэтэ Мииринэйгэ үрдүк таһымнаахтык ыытылынна.
edersaas.ru
Дьоро киэһэни Арассыыйа Суруйааччыларын сойууһун чилиэнэ, бэйиэт Вера Донская иилээн-саҕалаан ыытта. Тэрээһин биир уратытынан оҕолор да, саастаахтар да кыттыбыттара буолар. Оскуола оҕолоро, устудьуоннар, учууталлар бэйиэт нууччалыы тылбаастарын аахтылар. Кэрэ киэһэни ускуустуба храмын преподавателлара тыыннаах муусуканан доҕуһуоллаатылар. Бэрэпиэссэр А.А. Гольдман устудьуоннара Сандаарыйа хоһооннорун англия тылынан аахпыттарын мустубут дьон дохсун ытыс тыаһынан көрүстэ. Сырдык сыдьаай аараабыт киэһэтигэр Александра Григорьева ырыалара сахалыы-нууччалыы ылланнылар.
Кини духуобунай учуутала, бэрэпиэссэр Ксенофонт Уткин 2011 сыллаахха тахсыбыт “Мин үөрэнээччилэрим” диэн кинигэтигэр Александра Григорьева поэзиятын туһунан суруйбут тылларынан түмүктүүбүн:
“Сандаарыйа поэзията кистэлэҥ киэли, атын араҥа аан аартыгынан албаралыы айаннаан, көҥүл санаа күлүмүнэн күөдьүйэ, күлүбүрүү төлөннүрэн, иччилээх тойугунан, эҥсиллэр иэйиитинэн дьэргэлгэн оонньотон дьиримнэтэн, сулус гынан суһумнатан, саһарҕа саҕан сандаарытан дьэрэлитэр, дьэргэһитэр, эҥсэлитэр, эймэнитэр дорҕоонноро уус тыл умсулҕаннааҕынан, ийэ тыл илбистээҕинэн, хомоҕой хоһоон хомуһуннааҕынан кутуллан иһэр. Бэл, онноооҕор бэйэҥ да билбэккинэн, этиҥ сааһа аһыллан, көстүбэт эйгэ күлүмүгэр киирэн ылар курдуккун. Поэт кыыһар кыһатын кытыастар кыымнарын ийэ тыл илгэлээх дорҕооннорунан кынаттаан, кыырай халлааҥҥа кыыгыныы көтөр, килэдийэр киэҥ куйаар тоҕус аар аартыктарын добун дуорааннарыныын силбэһэр”.
“Саха сирэ” хаһыакка, edersaas.ru сайтка анаан Майя ВАСИЛЬЕВА, “Алмаастаах куорсун” айар түмсүү пресс-сэкирэтээрэ
Хаартыскалар А.Григорьева архыыбыттан