Быыстапка-дьаарбаҥка хаартан-самыыртан иҥнибэт!

Ааптар: 
Бөлөххө киир:

Тыа хаһаайыстыбатын министиэристибэтин тэрээһининэн, сылын ахсын ыытыллар өрөспүүбүлүкэтээҕи ас-үөл быыстапка-дьаарбаҥката Хомсомуол болуоссатыгар бүгүн уонна сарсын буолар.

edersaas.ru.

Бу икки күн устата  сүүрбэ биир улуустан, ол иһигэр уһук хоту Анаабыртан, Аллайыахаттан, Дьааҥыттан саҕалаан, соҕуруу Хатыыстыыртан тиийэ кэлбит тыа хаһаайыстыбатын табаарын оҥорооччулар бэйэлэрин бородууксуйаларын аҕаланнар атыылыыллар.

Төһө да хаардаах ардах түстэр, былааннаммыт дьаһал тохтообот: быыстапканы көрө-истэ кэлбит дьоҥҥо анаан АПК тэрилтэлэрин үлэһиттэрин итиэннэ эстрада сулустарын уус-уран кэнсиэртэрэ, асчыттар маастар-кылаастара, көрдөөх күрэхтэһиилэр тиһигин быспакка ыытыллаллар.

Быыстапка аһыллыытыгар Бырабыыталыстыба Бэрэссэдээтэлин солбуйаачы Денис Белозеров куорат олохтоохторун, быыстапка кыттыылаахтарын тыа хаһаайыстыбатын табаарын оҥорооччулар өрөспүүбүлүкэтээҕи «Ас-үөл» быыстапка-дьаарбаҥкалаар саҕаламмытынан эҕэрдэлээтэ, кыстыыр астарын хааччынан баралларыгар баҕарда. Бу тэрээһиҥҥэ сылтан сыл кыттааччы ахсаана элбээн, бородууксуйа көрүҥэ үксээн уонна тупсан иһэрин бэлиэтээтэ. Тыа хаһаайыстыбатын миниистирэ Александр Атласов быйыл кэккэ улуустарга төһө да кураан буолтун иннигэр, олохтоох дьаһалталар тэрээһиннэринэн кыстыыр от 95 бырыһыана хааччыллыбытын, бурдук уонна оҕуруот аһын хомуура, үүт уонна эт соҕотуопката кыраапык быһыытынан баран иһэллэрин, быйыл 11 сүөһү иитэр комплекс, 50 сылгы базата тутуллан үлэҕэ киллэриллэрин эттэ.

Тыа хаһаайыстыбатыгар өр сылаах үтүө суобастаах үлэлэрэ сыаналанан киин куорат бэтэринээрэ Анастасия Дьячковская РФ тыатын хаһаайыстыбатын министиэристибэтин Бочуотунай Грамотатынан, ТХМ Мелиорацияҕа уонна тыа хаһаайыстыбатын уунан хааччыйыыга управлениетын салайааччы Валентин Николаев «Саха Өрөспүүбүлүкэтин норуотун хаһаайыстыбатын үтүөлээх үлэһитэ» аатынан, Аллара Халыма улууһун ТХУ-тын начальнига Николай Прудецкай «Гражданскай килбиэн» бэлиэнэн, 90 сааһын томтойо туолбут өрөспүүбүлүкэ үтүөлээх агронома, үлэ бэтэрээнэ Клавдия Анисимова уонна Сунтаар улууһуттан Прокопий Акимов Саха Өрөспүүбүлүкэтин Бырабыыталыстыбатын Грамотатына наҕараадаланнылар.

Быыстапка-дьаарбаҥка икки күннээх үлэтин түмүгэ сарсын таһаарыллыаҕа. Үгэс курдук, көрүҥнэринэн ханнык хаһаайыстыбалар бастаабыттара биллиэҕэ, төһө киһи кыттыбыта, төһө суумалаах ас-үөл батарыллыбыта барыта быһаарыллыаҕа.

Раиса Сибирякова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0