«Хотугу тутуу индустрията» быыстапкаҕа эрдэттэн хас да кэпсэтии былаһааккаларын бэлэмнээбит буолан, үгүс интэриэстээх дьон сөбүлэҥ түһэрсэр дуогабардарын туппутунан сүбэлэһэ олороллоро — сонун көстүү.
edersaas.ru
Бу — быыстапка сүрүн соругун толору ситиспитин туоһута. Мин «Шишкин дом» диэн бэрт дьикти ааттаах чааһынай дьиэни тутар тэрилтэлэр хампаанньалар бөлөхтөрүн салайааччыта Иван Данилов, ХИФУ доценнара Михаил Лавров уонна Прокопий Романов кэпсэтэр былаһааккаҕа сылаас дьиэлэри тутууга аныгы хайысхалары ырыта олороллоругар түбэстим.
— Биһиги маһы таҥастыыр технологияны кэҥэтэр туһуттан олохтоох тутааччылары кытта сүбэлэһэ олоробут.
«Төгүрүк остуолга» кыттан, кэккэ кыһалҕалары ырыппыппыт, 2% ипотека туһунан кэпсэппиппит. Мас дьиэни тутуу кэскиллээхтик сайдан эрэрин интэриэһиргээтибит, — диэн техническэй наука кандидата Михаил Лавров санаатын үллэһиннэ.
Оттон чааһынай дьиэни тутар тэрилтэ салайааччыта Иван Данилов быйылгы сылга номнуо иккис быыстапкаҕа кыттарын бэлиэтээтэ:
— Бастакы быыстапка «Куруһаала» атыы-эргиэн дьиэтигэр буолбута. Быйылгы сыл саҥатыттан чааһынай дьиэлэри тутууга номнуо 20-тэн тахса дуогабары түһэристибит.
Ити курдук, «Хотугу тутуу индустрията» быыстапкаҕа Арассыыйа эригийиэннэриттэн кэлбит ааттаах-суоллаах собуоттары, кэмбинээттэри тэҥэ, олохтоох тутааччылар эмиэ бэрт көхтөөхтүк кыттан, кэскиллээх боппуруостары дьүүллэстилэр, саҥа бырайыактары, бииргэ үлэлээһини былааннаатылар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа уонна видеоҕа ааптар түһэриитэ уонна устуута