Бырабыыталыстыба чааһа муоста тутуллуутун боппуруоһугар ананыаҕа...
Бэлиитикэ - Олох-дьаһах

Бырабыыталыстыба чааһа муоста тутуллуутун боппуруоһугар ананыаҕа

СӨ Бырабыыталыстыбата Өлүөнэ өрүһү туоруур муостаны тутууга концессионнай сөбүлэһиигэ “Ростех” госкорпорацияны уонна “ВИС” бөлөҕү кытта илии баттаста.

edersaas.ru

Барыллаан оҥоһуллубут бырайыагынан муоста тутуллар сыаната 63,7  миллиард солкуобай, ити иһигэр 9,5 миллиарды кэтэх инвестор уйунар  ороскуота, оттон сүрүн үп – 54,2 миллиард солкуобай капитальнай грант, ол иһигэр 47,8 миллиард – федеральнай, 6,4 миллиард  — эрэгийиэннээҕи бүддьүөт. НДС киллэрэн, муоста тутуутун уопсай үбэ 82, 8 миллиард солкуобай, онон НДС төлөбүрүн кытта кэтэх инвестор уйунар үбэ барыта холбоон 28,6 миллиард солкуобай  буолар.

Муоста үлэҕэ киирдэҕинэ, чэпчэки уйуктаах массыыналар босхо, онтон атын массыыналар 1 тыһыынча солкуобайтан 4 тыһыынчаҕа  диэри  төлөөн туорууллара былааннанар.

Саха сирин Бырабыыталыстыбата Өлүөнэ өрүһү  туоруур муостаны тутууга  концессионнай сөбүлэһиигэ “Ростех” госкорпорацияны уонна “ВИС” бөлөҕү кытта илии баттаспытын туһунан  Ил Түмэн  дьокутаата Юрий Николаев санаатын үллэһиннэ :

—Өлүөнэ өрүһү туоруур муоста тутуллуута Сэбиэскэй кэм саҕаттан өрөспүүбүлүкэ олохтоохторун долгутар боппуруос. Билиҥҥи сайдыылаах  үйэҕэ паром уочаратыгар  бириэмэбитин да,  харчыбытын  да сүтэрэбит. Онон үс федеральнай суолу холбуур муоста тутуллара өрөспүүбүлүкэ сайдыытыгар, дьон олоҕо тупсарыгар суолталаах. Тимир суоллаах эбэтэр сир аннынан барар муоста диэн мөккүһүүгэ бириэмэни эрэ ыыттыбыт. Концессионнай сөбүлэһиигэ боппуруостар бааллар. Суумата да улахан.  Кэлэр нэдиэлэҕэ Ил Түмэҥҥэ Бырабыыталыстыба чааһа  бу концессионнай сүбэлэһиини ырытыыга уонна салгыы   ыытыллар үлэни  былаанныырга ананыаҕа.

Ньургуйаана Иванова, Саха сирэ хаһыат, edersaas.ru

Хаартыска интэриниэттэн

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

16 − 1 =