Бырабыыталыстыба бэрэссэдээтэлэ солбуйааччыларын кытары мунньахтаата

Ааптар: 
Бөлөххө киир:

Бырабыыталыстыба бэрэссэдээтэлэ Евгений Чекин солбуйааччыларын кытары кэккэ боппуруостар, ол иһигэр тыа баһаардарын умуруоруу, халаан итиэннэ хамнаска иэс уо.д.а. тула кэпсэттэ.

edersaas.ru


Бастакы вице-премьер Алексей Колодезников ойуур баһаардарын умуруоруу итиэннэ “Мир” рудник эмсэҕэлээбит үлэһиттэрин өйөөһүн эбии дьаһалларын тустарынан иһитиннэрии оҥордо. Бастакы вице-премьер бэлиэтииринэн, быһыы-майгы уустук, быһаарыыны эрэйэр кыһалҕа аҕыйаҕа суох, ол иһигэр рудник үлэтэ быстах тохтотуллубутунан, хамнас төлөбүрүн боппуруоһа баар.

Өрөспүүбүлүкэ баһылыга атырдьах ыйын 14 күнүгэр таһаарбыт ыйааҕынан, кураанынан сибээстээн Мэҥэ Хаҥалас, Нам уонна Хаҥалас улуустарыгар ыксаллаах быһыы-майгы эрэсиимэ биллэриллибитэ. Онон курааҥҥа “умайбыт” бурдук ыһыытыгар аах оҥоһуллан, Россия Федерациятын тыатын хаһаайыстыбатын министиэристибэтигэр ороскуот сорох чааһын толуйууга сайаапка ыытыллыбытын туһунан Бырабыыталыстыба бэрэссэдээтэлин бастакы солбуйааччы -тыа хаһаайыстыбатын уонна ас-үөл бэлиитикэтин миниистирэ Петр Алексеев иһитиннэрдэ. Күн бүгүҥҥү туругунан от былаана 69 % толоруллан иһэр. Ордук уустук балаһыанньаҕа ууга барбыт уонна курааннаабыт ходуһалардаах Орто Халыма, Абый, Өймөкөөн уонна Уус Алдан улуустарын нэһилиэктэрин хаһаайыстыбалара оттуу сылдьаллар. Бырабыыталыстыба бэрэссэдээтэлин бастакы солбуйааччы экономика миниистирэ Алексей Стручков судаарыстыбаннай бырагыраамалар испииһэктэрин бигэргэтии, өрөспүүбүлүкэ 2018-2020 сс. социальнай-экономическай сайдыытын барылын ырытыы, 2017-2019 сс. бүддьүөт ороскуотун көдьүүһүн үрдэтии дьаһалларын кэлим былааннарын иһитиннэрдэ.

Маны таһынан тус сыаллаах бөлөхтөр уонна бүддьүөт эйгэтин үлэһиттэрин хамнастарыгар көрдөрүүнү ситиһии итиэннэ хамнаһы төлөөһүҥҥэ иэс туһунан боппуруостар дьүүллэһилиннилэр. Вице-премьер Алексей Дьячковскай этэринэн, Үлэ уонна социальнай сайдыы министиэристибэтэ бүдьүөт эйгэтин үлэһиттэрин хамнастарын үрдэтии Концепциятын 2017-2018 сс. олоххо киллэрэр туһунан бырабыыталыстыба уурааҕын бырайыагын оҥорбут, онно хамнаһы үрдэтии дьаһаллара бөлөхтөрүнэн (педагогтар, медиктэр, култуура уонна наука үлэһиттэрэ) тыырыллыбыт. Хамнаска иэс атырдьах ыйын 15 күнүнээҕи чахчынан, “ОДьКХ” ГУТ киллэрэн туран, 224 мөл. солк. эбит.

Биһиги корр., Саха сирэ” хаһыат,  edersaas.ru

+1
0
+1
0
+1
0
+1
0
+1
0
+1
0
+1
0