Булгунньахтаахха Ийэ тыл күнүн бэлиэтээтилэр

Ааптар: 
Бөлөххө киир:

Бэҕэһээ, өрөбүлгэ Хаҥалас улууһун Булгунньахтаах нэһилиэгин Арчы Дьиэтигэр эдэрдиин-эмэнниин мустан, Төрөөбүт тыл уонна сурук-бичик күнүгэр анаммыт улахан тэрээһини ыыттылар.

Елена ПОТОЦКАЯ, «Саха сирэ» хаhыат, edersaas.ru

 — Ахсынньыга, Саҥа дьыл саҕана аһыллыбыт Арчы Дьиэтин бастакы тэрээһинин Ийэ тыл күнүнэн саҕалаатыбыт. Хабылык уонна хаамыска күрэхтэһиитигэр 10 саастарыттан 65 саастарыгар диэри кыттан, сүрдээх «эрийсиилээх» киирсии буолла. Күрэхтэһиини саха тылын учуутала Анна Черосова уонна алын сүһүөх кылаас учуутала Анфиса Алексеева тэрийдилэр. Муусука оскуолатын учуутала, тыйаатыр устуудьуйатын салайар Евгения Кириллина уһуйар оҕолоро «Сахам тыла» диэн хоһоону дорҕоонноохтук аахпыттара барыбыт куппутун тутта. Учуутал Любовь Алексеева салайар 4-с кылааһын уолаттара «Саһыл Сыһыы» хоһоону ааҕан, ытыс тыаһын хомуйдулар. Саха тылын былыргы кэминээҕиттэн бүгүҥҥү туругун туһунан нэһилиэк бибилэтиэкэрэ Анисия Дьяконова ырытыытын тэрээһин кыттыылаахтара олус интэриэһиргээн иһиттибит.

Бастакы тэрээһиммитигэр 50-ча киһи кыттыыны ылла. Тэрээһиммитин иитээччи Татьяна Слепцова оҕо саадыгар тэрийбит «Хоһоон» куруһуогун кырачааннара Павел Харитонов-Ойуку «Бурҕаллай» хоһоонунан астылар. Онтон «Айылгы» эбээлэр фольклорнай бөлөхтөрө былыргы «Кыҥкыа» диэн норуот матыыбынан ырыаны ыллаатылар.  «Оһуохай» түмсүү дьоро күнү барыбытын оһуохайдатан түмүктээтэ. Онон Ийэ тыл күнүгэр анаммыт бастакы тэрээһиммит олус табыллан, бары бэрт элбэҕи билэн-көрөн, дуоһуйа оонньоон, сынньанан тарҕастыбыт, — диэн кэпсиир Арчы Дьиэтин салайааччыта Ольга Алексеева.

Булгунньахтаахха 20-чэ уопсастыбаннай түмсүү баар эбит. Онон Ийэ күнүттэн саҕыллыбыт бастакы «кыымтан» ыччаттар уонна аҕалар, бэтэрээннэр, ырыаһыттар, хомусчуттар, иистэнньэҥнэр, оһуохайдьыттар, эбээлэр, эдэр ийэлэр түмсүүлэрэ, «Ситим» вокальнай ансаамбыл анал кыраапыгынан Арчы Дьиэтигэр мустан, үлэлэрин «кулуһуннуу уматыахтара».

э

Арчы Дьиэтин салайааччыта Ольга Алексеева салгыы кэпсииринэн, бу күннэргэ «Эһээ биһигэ» диэн саастаах эр дьон кулууба үлэтин саҕалаары бэлэмнэнэр. Манна ыал аҕалара, эһээлэрэ түмсэн, ыччаты иитиигэ туһуламмыт үлэни ыытыахтара. Ону тэҥэ, нэһилиэккэ социальнай харысхал үлэһиттэрэ «Үһүс көлүөнэ оскуолатын» тэрийэргэ былаанныыллар.

 Булгунньахтаах аҕаларын сэбиэтэ икки сыл устата кимтэн да, хантан да үп көрдөөбөккө, бэйэлэрэ субуотунньуктаан Арчы Дьиэтин туппута.  Онон нэһилиэк олохтоохторо аҕаларга махталлара сүҥкэн. Үлэһиттэр сарсыардаттан оһохторун тигинэччи оттон, Төрөөбүт тыл уонна сурук-бичик күнүгэр анаммыт тэрээһининэн үлэлэрин саҕалаатылар.

Елена ПОТОЦКАЯ, «Саха сирэ» хаhыат, edersaas.ru

 

+1
0
+1
0
+1
0
+1
0
+1
0
+1
0
+1
0