Хаҥалас улууһун Булгунньахтаах олохтооҕо Акулина Львова 2016 сыллаахха “Кэскил” сүөһү иитэр кэпэрэтиип баазатыгар бааһынай хаһаайыстыбатын тэриммитэ. Күн бүгүн 238 ынах сүөһүлээх, ол иһигэр 120 ыанар ынахтаах.
Олору алта киһи, түөрт ыанньыксыт, ньирэй көрөөччү уонна бостуук көрөллөр-истэлэр. Хаһаайыстыба ааспыт сылтан үп-харчы өттүнэн чэбдигирдии бырагырааматынан үлэлиир. Ааспыт сыллаах былаанын үүтү ыаһын уонна от соҕотуопкатын курдук сүрүн көрүҥнэргэ аһары толордо. Соторутааҕыта нэһилиэк олохтоохторугар үөрүүлээх күн үүннэ – хаһаайыстыба саҥа хотону тутан үлэҕэ киллэрдэ!
— Өр сыллаах баҕабыт олоххо киирдэ, — диэн хаһаайка үөрүүүтэ улахан. – Бэдэрээтчик “Интер” ХЭУо комплексы бэрт хаачыстыбалаахтык тутта. Манна ыанньыктарбытын киллэриэхпит, оттон ыччат сүөһүлэрбит хаһаайыстыбаннай ньыманан туппут хотоммутугар туруохтара.
Хаҥалас улууһун баһылыгын э.т. Федор Борисов этэринэн, ааспыт сыл түмүгүнэн улууска сүөһү ахсаана эбиллибит. Кэлиҥҥи сылларга “Бөртө” сылгы собуота” ХЭУо-ҕа үс толору хааччыллыылаах комплексы туттубут, онон Львова хаһаайыстыбатын хотоно төрдүс комплекс эбит. Кэлэр өттүгэр маннык эбийиэктэр “Тиит Арыы” уонна “Самартай” кэпэрэтииптэргэ тутуллуохтаахтар. Бырайыактара оҥоһуллан, экспертизэҕэ бэриллибиттэр.
Нэһилиэк олохтоохторун үөрүүлээх күннэринэн урукку сыллар бастыҥ ыанньыксыттара, “Өктөөп өрөбөлүүссүйэтэ”, Үлэ Кыһыл Знамята уордьаннардаах, Хаҥалас улууһун Бочуоттаах олохтооҕо Гаврил Чепалов эҕэрдэлээтэ. Тыа хаһаайыстыбатын министиэристибэтин Сүөһүнү иитиигэ уонна племенной үлэҕэ департаменын салайааччытын солбуйааччы Галина Осипова хаһаайыстыба ыанньыксыттара Зоя Тимофееваҕа “Саха сирин тыатын хаһаайыстыбатын бэтэрэээнэ”, Лидия Даниловаҕа “Саха Өрөспүүбүлүкэтин тыатын хаһаайыстыбатын туйгуна” бэлиэлэри туттарда.
Раиса Сибирякова, edersaas.ru