Булан ылыы дуу биитэр уоруу дуу?

Ааптар: 
Бөлөххө киир:

Уорууну булан ылыыттан араарыллыахтаах.

edersaas.ru


2017 сыллаахха Россия Үрдүкү суута быһаарбытынан, өскөтүн эмсэҕэлээччи малын-салын бэйэтэ өйдүүр сиригэр умнан кэбиспитин, ону атын киһи апчарыйбыт буоллаҕына бу уоруу диэн сыаналанар.

Ол курдук, суут бириигэбэринэн биир уоруйах малы, ол эбэтэр, ыарахан сыаналаах мобильнай төлөпүөнү уорбутун иһин эппиэккэ тардыллыбыта. Кини интэриэһин көмүскүүр адвокат «төлөпүөнү уорбатах, булан ылбыт» диэн модьуйсубута.

Суттанааччы атын малы дьулуһан туран бэйэтигэр апчарыйа сатыыр санаата суоҕун, төлөпүөнү эмсэҕэлээччиттэн ыла сатыырга ханнык да туһааннаах дьайыылары оҥорботоҕун, төлөпүөн хаһаайын болҕомтото суоҕуттан хаалбытын ыйбыта.

Эбиитин, булбут төлөпүөнүнэн уоруйах туһамматаҕын, ол оннугар төлөпүөнү төннөрүү туһунан эппиттэригэр, баҕа өттүнэн төннөрбүтэ ыйыллыбыта.

Суут маннык дакаастыы сатааһыны кытта сөбүлэспэтэҕэ уонна төлөпүөнү эмсэҕэлээччи сүтэрбэтэҕин, атын малларын кытта поликлиникаҕа өйдүүр сиригэр хаалларбытын тоһоҕолоон ыйбыта. Эмсэҕэлээччи төлөпүөнүн сүтэрбит диэни кытта сөбүлэспэтэҕэ, кини сотору буолан баран малларын хаалларбыт сиригэр кэлэн көрөн, төлөпүөнэ суоҕун билэн баран, бэйэтин нүөмэригэр төлөпүөнэ ханна баарын билээри эрийэ сатаабыт уонна тута полицияҕа тыллаабыт.

Төлөпүөн син биир ким эрэ киэнэ буоларын уоруйах билбитэ саарбахтаммат.  Сууттанааччы төлөпүөн эрийэригэр эппиэттээбэккэ, эбиитин сим-каартатын уларытан, тус бэйэтин төлөпүөнүгэр кубулуппут.

Холуобунай сокуон этэринэн, уоруу диэн туора малы-салы бэйэ туһатыгар таһаарына сатаан, хаһаайыныгар төннөрөр санаата суох бэйэҕэ ылыы уонна бэйэ эбэтэр атын дьон туһатыгар эргитии ааҕыллар.

РФ Үрдүкү суутун судебнай коллегията үөһээ ахтыллыбыт өрүттэри учуоттаан, булан ылыы буолбакка, уоруу буолар диэн түмүккэ кэлбитэ.

Иван Ядреев, Чурапчы улууһун борокуруора.

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0