Арассыыйаҕа харыйаны атыылыырга анаан үүннэрии технологията арҕаа дойдулартан, чуолаан Данияттан киирбитэ.
edersaas.ru.
Билигин исписэлиистэр көрүүлэринэн-истиилэринэн араас суорт мастары, ол иһигэр силиэксийэ көмөтүнэн таһаарыллыбыт Саҥа дьыллааҕы ураты хойуу лабаалардаах боруода харыйаны сиэмэнэн тылыннаран, үүннэрэр анал сирдэр (питомниктар) Арассыыйа киин уобаластарыгар элбээн эрэллэр. Кэнэҕэһин бу салаа баһырхай барыһы биэрэр биисинэс биир көрүҥэ буолар кэскиллэннэ.
Кыракый сиэмэни тылыннаран миэтэрэ кэриҥэ үрдүктээх, лаглаҕар быһыылаах харыйалары үүннэрэргэ килиимэтиттэн көрөн, алта-сэттэ сыл ирдэнэр. Икки бастакы сылга хахыйах үнүгэһэ тылыннарыллар, онтон арыый бөҕөргөөбүтүн кэнниттэн, эрдэттэн бэлэмнэниллибит сиргэ олордуллар. Үнүгэстэр күн уотун күүһүн уонна иҥэмтиэлээх эттиктэри сөптөөхтүк иҥэринэллэригэр бэйэ-бэйэлэриттэн икки миэтэрэ тэйиччи буолуохтаахтар. Салгыы түөрт-биэс сыл устата хахыйахтар анал көрүүгэ киирэллэр. Анаан көрөөччүлэр кэмиттэн кэмигэр сыыс отун ыраастаан, буорун көбүтэн, ордук-хоһу лабаалары сарбыйан биэрэллэр. Ситэллэрин саҕана сайын анал кэнтиэйнэрдэргэ олордон, уу кута-кута, эбии аһаталлар. Кыһын ахсынньыга быһан, харыйа ырыынагар илдьэллэр, онуоха ойуур хаһаайыстыбата арыаллыыр суруктары биэрэр.
Раиса Сибирякова, «Саха сирэ» хаһыат, edersaas.ru