Омук сиригэр күүлэйдии, сынньана бардаххына, гостиница сакаастыыргар бастакы уочарат, босхо вай-фай баар дуу, суох дуу диэн дьон үгүстүк ыйытааччы. Буолумуна, мобильнай интэриниэтинэн туһаныы, төлөпүөнүнэн кэпсэтии олус ыарахан буолар.
edersaas.ru
Онон, МегаФон суотабай сибээс оператора абоненнарыгар утары баран, Саҥа дьыллааҕы бэлэх оҥордо. Аан дойдуга биллэр Booking.com тревел-платформаны кытары бииргэ үлэлэһиигэ сөбүлэһии түһэрсэн, туһааннаах хампаанньа абоненнара 130 тас дойдуга босхо роуминынан туһанар кыахтаннылар. Ол аата, үгүс харчыны матайдаабакка, мүнүүтэлэрин, сөкүүндэлэрин аахпакка, дьоннорун кытары буор-босхо кэпсэтиэхтэрэ.
Вooking.com нөҥүө гостиница, отель сакаастаабыт МегаФон абоненнара роуминынан босхо кэпсэтиэхтэрэ. Ол курдук, күн ахсын төлөпүөнүнэн босхо кэпсэтэллэригэр анаан 1 чаас уонна 1 Гб интэриниэт бэриллиэҕэ. Билиҥҥи туругунан, сибээс хампаанньата 130 омук дойдутугар баар 1 мөлүйүөн кэриҥэ гостиницаҕа маннык бырайыагы үлэлэтэн эрэр.
МегаФон кэмиэрчэскэй дириэктэрэ Влад Вольфсон: «Саҥа дьыллааҕы уһун өрөбүллэр буолаары турдахтарына, бу бырайыакпытын олоххо киллэрдибит. Билигин Арассыыйа олохтоохторо тас дойдуларга сынньана бараары оҥосто сылдьар буолуохтаахтар. Омук сиригэр бардаххына, роуминынан туһаныы сыаналаах буолар. Быһа холоон, Арассыыйа олохтоохторо омук сиригэр бардахтарына, аан дойдутааҕы кэпсэтиигэ күн ахсын 3 мүнүүтэни барыыллар. Онон, биһиги абоненнарбыт ыксаабакка дьоннорун кытары кэпсэтэллэрин курдук, бу бырайыагы үлэлэтэн эрэбит», – диэн иһитиннэрдэ.
Booking.com вице-бэрэсидьиэнэ Рипси Банкуриан айанньыттарга анаан МегаФон суотабай сибээс оператора дьоһун бэлэҕи оҥордо диэн этэр.
Бэлэмнээтэ Анивера Акимова, edersaas.ru