Болуоссаттар оҕо саҥатынан туоллулар
Олох-дьаһах

Болуоссаттар оҕо саҥатынан туоллулар

Бүгүн Дьокуускай куорат хас биирдии болуоссата оҕо чугдаарар саҥатынан туолла, ырыа-тойук, муусука ыраахха тиийэ дьиэрэһийдэ. Онуоха эбии халлаан сайыҥҥылыы киэбин дьэ кэтэн, икки бүк үөрүүнү бэлэхтээтэ.

edersaas.ru

Маҥнай Ленин аатынан болуоссакка тиийэбин. Сыанаҕа бииртэн-биир кэрэ куоластаах ырыаһыттар тахсаллар. Түргэн тэтимнээх ырыа, үҥкүү кэллэҕинэ көрөөччүлэр хаалсыбаттар, тэҥҥэ хамсанан-имсэнэн иһэллэр.

Көхтөөх ыччат!

Уһун кыһын устата үлэлээбэккэ турбут фонтаны холбоон, оҕо-аймах онно тоҕуруоспутугар тиийэбин. Оҕолор барахсаттар көҥүл биэрдэххэ сөтүөлүөх да курдуктар!

«Фонтан тымныы уутугар сөрүүкүү түһүөххэ!»

Фонтан кэтэҕин диэки балай даҕаны киэҥ территория тула быа тарпыттар уонна быыһа суох уруһуйдаммыт кумааҕылары ыйаабыттар. Ыйыталаһан билбитим, бу Бүтүн Арассыыйатааҕы “Добрый пленэр” аахсыйа эбит.

Пленэри тэрийээччилэр

“Юные якутяне” өрөспүүбүлүкэтээҕи ресурснай киин педагог-психолога Мария Габышева иһитиннэрбитинэн, быйыл хаһааҥҥытааҕар даҕаны элбэх оҕо уруһуйдаан көрөргө холоммут, ол курдук, аахсыйаҕа барыта 80-тан тахса оҕо кыттыбыт. Уһуйаан иитиллээччилэриттэн саҕалаан, аһаҕас халлаан анныгар ким-тугу баҕарбытын, өйүгэр көтөн түспүтүн барытын харандаас араас өҥүнэн кумааҕыга түһэрбит.

Салгыы билэр дьоммун көрсөн, аргыстаһан Орджоникидзе болуоссатын диэки хаамабын. Киин киинэ тыйаатырыгар чугаһааппытын кытта муусука тыаһа дьиэрэһийэр. Манна көрү-нары эрэ көҕүлүттэн туппаттар, оонньуунан эрэ муҥурдамматтар, төрөппүттэр оҕолорун быраастарга көрдөрөн хаалыахтарын сөп эбит. Ол курдук, Дьокуускай куораттааҕы оҕо балыыһата сылын аайы “Доруобуйа дьаарбаҥкатын” тэрийэн ыытар. Педиатр Айталина Лазарева: “Оҕолор доруобуйаларын экспресс-ньыманан көрөбүт. Ол түмүгэр педиатр бэйэтин сүбэлэрин биэрэр. Бүгүн 41 оҕо көрдөрүннэ. Кинилэр ортолоругар ордук хааннарын баттааһыннара уларыйыылаах, мөлтөх тиистээх оҕолор бааллар. Оннук оҕолору исписэлиистэргэ көрдөрөллөрүгэр сүбэлиибит”, — диэн кэпсиир.

“Бриллиантовые нотки”, онтон тута Дьокуускайдааҕы Оҕо дыбарыаһын иитиллээччилэрэ кэнсиэр, муода көрдөрөллөр.

Павловтар дьиэ кэргэн

Кыталык кыргыттарын кытта Орджоникидзе болуоссат устун күүлэйдии сылдьар Мария, Петр Павловтар:

Бүгүн Оҕо көмүскэлин күнүгэр оҕолорбутун кытта бырааһынньыктааҕы тэрээһини көрө сылдьабыт. Улахан кыыспыт хараҕа сыанаттан арахпат, (түөрт-биэс саастаах кыысчаанын диэки ийэ киһи таптаабыт харахтарынан көрөн ылар. Ааптар Л.П.), хас муусука аайы тэҥҥэ үҥкүүлэһэ турар. Ордук кэнсиэри биһирээтибит. Атыы-тутуу, оонньуур арааһа… Бу эбиэт кэнниттэн саҥа кэллибит. Хата, күммүт-дьылбыт туран биэрдэ – диэн санаатын үллэстэр.

Итиннэ хаартыскаҕа түһэллэр, манна мыыла хабахтарын ыыта оонньууллар, онно флеш-мобтаан ыллаллар, бэл диэтэр, фонтан тула эбээлэр сиэннэрин эккирэтэллэр…

 

Людмила ПОПОВА, «Саха сирэ» хаһыат, edersaas.ru

Андрей СОРОКИН уонна ааптар хаартыскаҕа түһэриилэрэ.

 

2
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

5 − 4 =