Ааспыт нэдиэлэттэн СӨ Үөрэҕин уонна наукатын министиэристибэтэ “Саха” НКИХ араадьыйатыгар “Микрофоҥҥа — наука” диэн биэриини таһааран эрэр.
Биэрии нэдиэлэҕэ биирдэ (субуотаҕа) 15 чаас 30 мүнүүтэттэн FM 107.1 долгуҥҥа тахсар. СӨ үөрэҕин уонна наукатын миниистирин бастакы солбуйааччы, география наукатын дуоктара Михаил Присяжнай иилээн-саҕалаан ыытар. Бырагыраама наука тиэмэтин ситимнээхтик, араас өттүттэн көрдөрөр соруктаах. Манна нэһилиэнньэ, салайааччылар, уопсастыбаннас кыттыахтара. Наука судаарыстыба уонна уопсастыба сайдыытын биир сүрүн төрүөтэ буоларын быһыытынан, наука суолтатын, арыйыылары, чинчийиилэри сырдатыахтара. “Академик кэпсиир”, “РФФИ бырайыага”, “Эдэр учуонай”, “Инникигэ хардыы”, “Наука бэстибээлэ 0+”, “Наука” национальнай бырайыак” уонна “Наука киһи олоҕор” диэн рубрикаларынан барыаҕа.
Бастакы биэриигэ СӨ Наукаларын академияларын академига, геология-минералогия наукатын дуоктара, бэрэпиэссэр Игорь Колодезников наука чинчийиллэр хайысхаларын, Саха сиригэр сир хамсааһынын (сейсмичность) сыаналааһын, геологияҕа чинчийии салаатын туругун уонна Саха сирин социальнай-экэнэмиичэскэй сайдыытыгар кэлимсэ научнай чинчийии салгыытын хайдах көрөрүн кэпсээбитэ.
СӨ Үөрэҕин уонна наукатын пресс-сулууспата.